Ижтимоий тармоқларда Тошкентнинг Анҳор канали устидаги пиёдалар кўприги устунлари емирилаётгани тасвирланган суратлар тарқалди. «Ўзбекистон темир йўллари» АЖ Тошкентдаги мазкур пиёдалар кўпригининг ҳолати бўйича изоҳ берди.
Маълум қилинишича, кўприк таянчларининг пойдевори конструкциясида лойиҳа бўйича 41 метр чуқурликка ўрнатилган диаметри 1500 миллиметр бўлган темир-бетон қозиқлар кўзда тутилган.
«Фотосуратларда айнан ана шу қозиқларнинг бетонланган қисми акс этган. Қурилиш технологиясига кўра, таянч жойлаштирилаётганида каналдаги сувнинг максимал даражаси ҳисобга олинган. Бунда таянчнинг конструктив унсури бўлмаган ва унинг юк кўтариш лаёқатига таъсир кўрсатмайдиган қозиқ пардозланган. У шунчаки архитектуравий-эстетик кўриниш беришга мўлжалланган. Ушбу пардоз кўриниш сувнинг минимал даражаси ҳисобидан келиб чиқиб ишланган. Жорий мавсумда сув сатҳи сезиларли даражада пасайди, натижада нотекис юзага эга бетон устунлар кўриниб қолди», — дейилади хабарда.
Таъкидланишича, ушбу пиёдалар кўприги хавф туғдирмайди ҳамда тўлиқ соз ҳолатда.
Аввалроқ Чирчиқ дарёси устига қурилган кўприк яроқсиз ҳолга келаётгани тасвирланган видео юзасидан ҳолат воқеа жойига бориб, мутахассислар иштирокида ўрганилган эди. Экспертларнинг хулосасига кўра, кўприк атрофдаги шағал қазувчилар сабаб яроқсиз ҳолга келиб қолган.
Шу йилнинг сентябрь охирларида эса Сурхондарёнинг Қумқўрғон туманидаги 6,5 миллиард сўмга қуриб битказилган кўприк ҳеч қанча вақт хизмат кўрсатмай қулаб тушгани тўғрисида хабар берилганди. Кейинроқ вилоят ҳокимлиги сифатсиз кўприк қурган қурувчи ишини дастлаб жиноят иши очишни рад этган транспорт прокуратураси ўрганаётганини маълум қилганди.
Изоҳ (0)