Тошкентда ўпкани МСКТ қилдириш нархи коронавирус пандемиясига қадар 90 минг сўмдан 150 минг сўмгача бўлган, пандемия даврида (июль—август ойларига келиб) 195 минг сўмдан 400 минг сўмгача кўтарилган. Бу ҳақда, Тошкент шаҳрида жойлашган тиббиёт муассасаларидаги ўпканинг мултиспирал компьютер тамографияси (МСКТ) нархларини ўрганиб чиқиб, Монополияга қарши курашиш қўмитаси (МҚКҚ) маълум қилди.
Қўмитанинг қайд этишича, юзага келган эпидемиологик вазият аҳоли ўртасида ўпканинг мультиспирал компьютер томографиясига (МСКТ) бўлган эҳтиёжининг ортишига сабаб бўлган. Дастлабки тезкор ўрганиш натижаларига кўра, июль—август ойларида Тошкентда 18 та тиббиёт муассасасида МСКТ хизмати кўрсатилган. Хизматнинг умумий қиймати 185 миллиард сўмни ташкил этган. У ёки бу шахс бозорни монополлаштириб олгани аниқланмаган.
«Клиникалардан олинган маълумотларга кўра, нархнинг ўсиши МСКТга бўлган талабнинг кескин ортиши, касалланганлар сони кўпайиши билан боғлиқ бўлиб, шу сабабли кўплаб тиббиёт муассасалари 24 соатлик иш тартибига ўтгани, ускуналарга ортиқча юклама тушаётгани, бу эса уларнинг тез бузилишига сабаб бўлаётгани, қайта тиклаш учун бутловчи ва эҳтиёт қисмларни доимий сотиб олишга тўғри келаётгани кўрсатилган», - дейилади қўмита ахборотида.
Бундан ташқари, тиббиёт муассасаларнинг 24 соатлик иш тартибига ўтгани ортидан ходимларга қўшимча ҳақ тўлашга тўғри келгани ҳам хизмат нархининг кўтарилишига таъсир кўрсатган. «Айрим тиббиёт муассасаларининг ҳисоб-китобларини ўрганиш натижалари МСКТ нархларининг ошиши хизматнинг ўзига хос хусусиятлари ва индивидуал ёндашувидан келиб чиққан ҳолда шаклланишининг тўғрилигини кўрсатди», - дея қайд этиб ўтган қўмита.
Айни вақтда, Монополияга қарши кураш курашиш қўмитаси, Ўзбекистондаги эпидемиологик вазиятни ҳисобга олган ҳолда, хусусий тиббиёт муассасаларига МСКТ хизмати учун нархларни асоссиз оширмаслик ҳақида кўрсатма берган.
Изоҳ (0)