Қашқадарёда ҳайдовчилик гувоҳномасини олиб беришни ваъда қилиб, ўзганинг 4 млн сўм пулини ўзлаштирган фуқарога жиноят иши қўзғатилди

Қашқадарё вилоятининг Деҳқонобод туманида яшовчи С.Р. икки нафар фуқарога ҳайдовчилик гувоҳномасини олиб беришни ваъда қилиб, уларнинг 4 миллион сўм пулини ўзлаштирган. Бу ҳақда «Дарё»га туман ИИБ бошлиғи ўринбосари Дилшод Мирзаев хабар берди.

Маълум қилинишича, Деҳқонобод туманининг «Мустақиллик» маҳалласида яшовчи 63 ёшли Гулавад Жумаева туман ИИБга мурожаат қилиб, 2020 йил апрель ойида туманнинг «Аэродром» маҳалласида яшовчи 64 ёшли С.Р. ўзини «Ватанпарвар» ўқув-спорт техник клубида ишлашини айтиб, «карантинда ўғли Исмоил Сувонов ўқув курсида ўқияпти» деб ҳужжат тайёрлашини ва ҳайдовчилик гувоҳономаси олиб беришини айтган. Эвазига эса 2 миллион сўм пул сўраган. Ва айни пайтга қадар ваъдасини бажармай, пулларини ўз эҳтиёжи учун ишлатиб юборганини, шу сабаб унга қонуний чора кўрилишини сўраган.

Шунингдек, фуқаро Султонмурод Холназаров ҳам туман ИИБ бошлиғи номига ариза билан мурожаат қилиб, С.Р. унга ҳам туман «Ватанпарвар» ўқув-спорт техник клубида ишлашини айтиб, карантин пайтида ўқиётгани ҳақида ҳужжат тайёрлаб беришини, ҳайдовчилик гувоҳонмаси учун 2 миллион сўм пул бериши лозимлигини айтган. Ва айни пайтга қадар алдаб келганини маълум қилган.

Мазкур ҳолат юзасидан туман ИИБ ҳузуридаги Тергов бўлинмаси томонидан фуқаро С.Р.га Жиноят кодексининг 168-моддаси 3-қисми «б» банди (такроран ёки хавфли рецидивист томонидан фирибгарлик) билан жиноят иши қўзғатилган. Жиноят иши юзасидан дастлабки тергов ҳаракатлари давом этмоқда.

Эслатиб ўтамиз, мазкур модда билан айбланган фуқаронинг айби исботланса, у базавий ҳисоблаш миқдорининг уч юз бараваридан тўрт юз бараваригача миқдорда жарима ёки икки йилдан уч йилгача ахлоқ тузатиш ишлари ёхуд муайян ҳуқуқдан маҳрум этилган ҳолда беш йилдан саккиз йилгача озодликдан маҳрум қилиш билан жазоланади.