Вазирлар Маҳкамасининг 2020 йил 9 октябрдаги 635-сон қарори билан туси ўзгартирилган (қорайтирилган) ойнали автотранспорт воситаларидан фойдаланишни тартибга солиш бўйича айрим ўзгартиришлар киритилди. Бу ҳақда ЎзА хабар берди.
Жумладан, М1 (енгил автомобиллар), N1 ва N2 тоифага оид автотранспорт воситалари орқа ён ойналарининг тусини ўзгартиришга (қорайтиришга) рухсатнома бериш учун тўлов ставкалари жисмоний шахслар учун базавий ҳисоблаш миқдорининг 5 баравари (1 115 000 сўм) этиб белгиланди. Бунга қадар ушбу миқдор БҲМнинг 10 баравари (2 230 000 сўм) эди.
Юридик шахслар учун орқа ён ойнани қорайтириш учун тўлов миқдори ўзгармаган — БҲМнинг 10 баравари (2 230 000 сўм).
Шунингдек, орқа ва олд ён ойналар тусини ўзгартиришнинг тўлов миқдори ҳам аввалгидек сақланиб қолди, яъни жисмоний ва юридик шахслар учун БҲМнинг 50 бараварини (11 150 000 сўм) ташкил этади.
Эслатиб ўтамиз, ижтимоий тармоқларда 2020 йил 1 июндан бошлаб автотранспорт воситалари ойналарини «тонировка» қилиш нархи тушиши кутилаётгани бўйича хабарлар тарқалганди. Ўзбекистон Ички ишлар вазирлиги Йўл ҳаракати хавфсизлиги бош бошқармаси мазкур хабарларни рад этганди.
Изоҳ (0)