Маҳалла ва оилани қўллаб-қувватлаш вазирлиги Вазирлар Маҳкамасининг «Фуқароларнинг ўзини ўзи бошқариш органлари фаолиятида фаол қатнашаётган фуқароларни рағбатлантириш чора-тадбирлари тўғрисида»ги қарори лойиҳасини муҳокама учун эълон қилди.
Ҳужжатда қайд этилишича, вазирлик томонидан апрель ойида ишлаб чиқилган «Фуқароларнинг ўзини ўзи бошқариш органлари тўғрисида»ги қонун лойиҳасининг янги таҳрири Олий Мажлис Қонунчилик палатасига киритилган. Янги таҳрирда қуйидаги тушунчалар киритилган:
- кўчабоши — фуқаролар йиғини ҳудудидаги кўчаларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро;
- уйбоши — фуқаролар йиғини ҳудудидаги кўп квартирали уйларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро.
Қарор лойиҳасида 2021 йил 1 январдан бошлаб кўчабоши ва уйбошиларни рағбатлантиришни бошлаш таклиф этилган. Хусусан, уларга коммунал хизматлар учун мажбурий тўловлар бўйича базавий ҳисоблаш миқдорининг 50 фоизи (111 500 сўм) миқдорида ҳар ойда компенсация тўловлари тўлаб берилиши мумкин.
- фуқаролар йиғини билан узвий ҳамкорликни йўлга қўйганлиги;
- уй-жой мулкдорларининг уйдан самарали фойдаланиш борасидаги фаол иштирокини таъминлаганлиги;
- уй-жой мулкдорлари томонидан коммунал ва фойдаланиш тўловларининг ўз вақтида тўланиши юзасидан жамоатчилик назоратини ўрнатганлиги;
- белгиланган тартибда кўча ва уй дафтарларини юритиб борганлиги;
- бириктирилган кўча ёки уйда аҳоли хавфсизлинини таъминлаш, жамоат тартибини сақлаш юзасидан тегишли тадбирларни белгилашда ҳудуд профилактика инспектори билан узвий алоқа ўрнатилганлиги;
- бириктирилган кўча ёки уйда ва унинг атрофида ободонлаштириш, кўкаламзорлаштириш ишларини ташкил этиш, бу борада ҳашарлар, шанбаликлар каби жамоат тадбирларини ташкил этиш ва мазкур тадбирларнинг ўтказилишида фаол иштирок этганлиги;
- ноқонуний қурилишларни, ўзбошимчалик билан эгаллаб олинган ҳудудларни аниқлаш ҳамда тегишли мутасадди идораларга хабар беришишдаги фаоллиги;
- аҳоли ўртасида мамлакатимизда амалга оширилаётган давлат сиёсатининг устувор йўналишлари, кенг кўламли ислохотларнинг моҳияти, қабул қилинган қонун ҳужжатлари ва давлат дастурлари аҳамиятининг тарғибот ва ташвиқотини ташкил қилганлиги.
Ҳужжат лойиҳаси муҳокамаси 21 октябрга қадар давом этади.
Изоҳ (0)