Ўзбекистонда йўл-транспорт ҳодисасини ҳуқуқни муҳофаза қилувчи органлар ходими иштирокисиз расмийлаштириш тартибини жорий этиш режалаштирилмоқда. Бу Вазирлар Маҳкамасининг «Транспорт воситалари эгаларининг фуқаролик жавобгарлигини мажбурий суғурта қилиш қоидаларига ўзгартиришлар ва қўшимчалар киритиш ҳақида»ги қарори лойиҳасида назарда тутилган.
Лойиҳага кўра, транспорт воситалари эгаларининг фуқаролик жавобгарлигини мажбурий суғурта қилиш қоидаларнинг 2-бандида Йўл-транспорт ҳодисаси ҳақидаги билдиришнома тушунчасига таъриф берилмоқда.
Қоидаларнинг 11, 34, 341 37 ва 38-бандлари йўл-транспорт ҳодисасини ҳуқуқни муҳофаза қилувчи органлар ходими иштирокисиз расмийлаштиришга оид қоидалар билан тўлдирилмоқда.
Шунингдек, йўл-транспорт ҳодисаси ҳақидаги билдиришнома бланкаси намунаси қоидаларга 7-илова бўлиб киритилмоқда.
Йўл-транспорт ҳодисаси ҳақидаги билдиришноманинг (Европротокол) амалиётга жорий этилиши муносабати билан биринчи навбатда йўл ҳаракати хавфсизлиги ходимлари ва ҳайдовчилар ўртасидаги бевосита мулоқотни амалга оширишда инсон омилига ва ортиқча қоғозбозчиликка чек қўйилади ва фуқароларнинг ортиқча сарсонгарчиликлари олди олинади. Ҳар бир содир этилган йўл-транспорт ҳодисасини расмийлаштириш учун йўл-патруль хизмати инспекторларининг вақти ҳам тежалади.
Аввалроқ Ўзбекистонда автомобилнинг суғуртаси йўқлиги учун жарима майдончасига жойлаштириш амалиёти бекор қилинганди.
Изоҳ (0)