Қирғизистонда юзага келган кескин вазият ва воқеалар ривожи Ўзбекистонда жиддий ташвиш уйғотмоқда. Бу ҳақда Ўзбекистон Ташқи ишлар вазирлиги қўшни мамлакатда юз бераётган воқеалар бўйича берган баёнотида маълум қилди.
Баёнотда айтилишича, Ўзбекистон яқин қўшни ва стратегик шерик сифатида қардош Қирғизистондаги вазиятнинг мамлакат Конституцияси ва миллий қонунчилиги нормаларига мувофиқ тез орада барқарорлашувига умид қилади.
«Ўзбекистон билан Қирғизистон ўртасидаги дўстлик, яхши қўшничилик ва кўп қиррали ҳамкорлик муносабатларини янада ривожлантириш ҳамда мустаҳкамлашга қатъий содиқлигимизни яна бир бор тасдиқлаймиз», — дейилади баёнотда.
Ўзбекистон ТИВ томонидан таъкидланишича, Қирғизистоннинг барқарорлиги ва мустаҳкам ривожланиши бутун Марказий Осиё минтақаси хавфсизлиги ва фаровонлигининг муҳим омили ҳисобланади.
«Ҳозирги мураккаб вазиятда биз Ўзбекистонда кўп асрлик тарихий ва қариндошлик ришталари, умумий маданий ҳамда маънавий қадриятлар билан мустаҳкам боғланган биродар Қирғизистон халқига ҳар томонлама кўмак кўрсатишга тайёрмиз», — дейилади баёнотда.
Аввалроқ Қирғизистон чегара хизмати Ўзбекистон 6 октябрь соат 00:00 дан бошлаб Қирғизистон ва учинчи давлат фуқароларига мамлакатга кириш учун чекловларни жорий қилгани ҳақида хабар берганди. Давлат божхона қўмитасининг билдиришича, чеклов фақат Қирғизистонга кирмоқчи бўлган Ўзбекистон фуқаролари учун амал қилади.
Эслатиб ўтамиз, Бишкекда 5 октябрь куни мамлакат парламентига ўтказилган сайлов натижаларидан норози бўлган минглаб кишилар намойишга чиқди. Намойишлар тартибсизликка айланиб кетди, тартибсизликларда бир неча юз киши жароҳат олди, бир киши вафот этди. Намойишчилар мамлакат парламенти ва президент администрацияси жойлашган бинони эгаллаб олди, шунингдек, мамлакатнинг собиқ президенти Алмазбек Атамбаев ва собиқ бош вазир Сапар Исаковни қамоқдан озод қилди.
Қирғизистон Марказий сайлов комиссияси 6 октябрь куни парламент сайлови натижаларини ҳақиқий эмас деб топди. Қирғизистон бош вазири Кубатбек Бўронов намойишлар ва тартибсизликлар ортидан истеъфога чиқди, мамлакат парламенти намойишчилар томонидан қамоқдан озод қилинган собиқ депутат Садир Жапаровни мамлакатнинг янги бош вазири этиб тайинлаш учун овоз берди.
Изоҳ (0)