Жиззахда синфдош қизларни машинада сайр қилдирмоқчи бўлган 9-синф ўқувчиси ЙТҲ содир этди (видео)

Жиззах вилояти Пахтакор туманида 9-синф ўқувчиси йўл-транспорт ҳодисаси содир этди. Ўқувчининг онаси ўғлига автомобиль калитини ишониб топширган, йигитча эса икки нафар синфдош қизни автомобилда сайр қилдирмоқчи бўлган. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.

Содир бўлган ЙТҲга гувоҳ бўлган бошқа бир ҳайдовчининг сўзларига кўра, ўсмир бир километр масофада машинани гоҳ ўнгга, гоҳ чапга олиб, орқадан келаётган транспорт воситаларининг ҳаракатини чеклаб келган. Орқадан келаётган ҳайдовчи тўхташ ишорасини берганидан кейин ўсмир бошқарувни йўқотиб, автомобиль йўлдан чиқиб кетган. Гувоҳнинг сўзларига кўра, автомобиль салонида икки нафар қиз бола, уларнинг қўлида эса ёш бола бўлган.

Воқеа жойига келган ўсмирнинг отаси ўғлини одамлар олдида уришни бошлаган. Ўсмирнинг айтишича, у машинани аввалдан ҳайдаб келган.

Жиззах вилояти ИИБ ЙҲХБ катта инспектори Эркин Очиловнинг маълум қилишича, мазкур ЙТҲ Пахтакор—Зафаробод автомобиль йўлининг 72-километрида содир бўлган. Ўқувчининг автомобиль бошқариш учун етарли малакаси бўлмагани сабабли бошқарувни йўқотиб, йўл четидаги тўсиққа урилган ва йўлдан чиқиб кетган. Бахтли тасодиф туфайли автомобилда бўлган ҳайдовчи ва йўловчилар жароҳат олмаган.