Ўзбекистон Суперлигаси 18-тури доирасидаги сўнгги икки учрашув якунига етди. Қаршидаги “Марказий” стадион “Бухоро” — “Хоразм” баҳсига мезбонлик қилган бўлса, “Сурхон” Термизда “Бунёдкор”ни қабул қилди.
Қаршида ўтган “Бухоро” — “Хоразм” учрашуви 1:1 ҳисобидаги дуранг билан якунланди. Баҳснинг 55-дақиқасида урганчликлар ҳужумчиси Шаҳрам Самиев ҳисобни очди. Тожикистонлик футболчи мезбонлар дарвозасини ишғол қилиб, жамоасини олдинга олиб чиқди. Аммо ўйин сўнгида “Бухоро”нинг босниялик легионери Доминик Бегич жавоб голини уриб, жамоасини мағлубиятдан қутқариб қолди.
Натижада жамоалар 1 очкодан бўлишиб олди. 19 очко жамғарган “Хоразм” турнир жадвалида 12-ўринни эгаллаб турган бўлса, “Бухоро” 14 очко билан 15-поғонада бормоқда.
Куннинг иккинчи ўйинида “Сурхон” ўз майдонида “Бунёдкор”ни қабул қилиб, 3:1 ҳисобида зафар қучди. Термизликларнинг ўйиндаги ҳисобни 17-дақиқада Рустам Турдимуродовнинг голи эвазига очди. 34-дақиқада Асилбек Жумаев фарқни иккитага ошириб қўйган бўлса, 73-дақиқада эса Турдимуродов ўзининг ўйиндаги иккинчи голини уриб, ҳисобни йирик кўринишга келтириб қўйди. Ўйин якуни арафасида Исуки Урата “Бунёдкор”нинг ягона жавоб голига муаллифлик қилди.
Ушбу ғалабадан сўнг “Сурхон” очколар сонини 23 тага етказиб, 8-ўринга кўтарилди. “Бунёдкор” эса 31 очко билан 6-поғонани эгаллаб турибди.
Ўзбекистон Суперлигаси
18-тур
13 август, чоршанба
“Бухоро” — “Хоразм” 1:1
Голлар: 0:1 — Самиев (55), 1:1 — Бегич (90).
“Сурхон” — “Бунёдкор” 3:1
Голлар: 1:0 — Турдимуродов (17), 2:0 — Жумаев (34), 3:0 — Турдимуродов (73), 3:1 — Урата (90).
Изоҳ (0)