Россиянинг «Вектор» вирусология ва биотехнология давлат илмий маркази коронавирусга қарши вакцина учун патент олди. Яратилган вакцина учун учта патент берилди, уларнинг ҳар бири вируснинг модификация қилинган маълум бир қисми учун тақдим этилди. Бу ҳақда Meduza хабар берди.
«Новосибирсклик олимлар вируснинг уч қисми — синтетик пептид антигенлардан иборат бўлган вакцинани яратди. Улар асосидаги вакцина COVID-19’га қарши иммун реакциясини юзага келтиради ва кейинчалик иммунитет ривожланишига хизмат қилади», — дейилади «Роспатент» томонидан берилган хабарда.
«Вектор» маркази томонидан яратилган вакцина «ЭпиВакКорона» номини олди ва Россияда патентланган иккинчи вакцина бўлди.
Россияда патентланган ва рўйхатга олинган COVID-19’га қарши биринчи вакцина Гамалея номидаги эпидемиология ва микробиология маркази томонидан яратилган «Спутник-V» вакцинаси ҳисобланади. Унинг синовлари ҳали тўлиқ якунига етмаган.
Сентябрь ойида Россия Соғлиқни сақлаш вазирлиги коронавирусга қарши учинчи вакцинанинг синовларига рухсат берди. Мазкур вакцина Россия Фанлар академиясининг Чумаков номидаги иммунобиологик дорилар яратиш ва тадқиқ қилиш илмий маркази томонидан яратилган.
Аввалроқ Ўзбекистон «Вектор» илмий маркази томонидан ишлаб чиқарилган мазкур вакцина рўйхатдан ўтказилгандан сўнг унинг қўшма синовларини ўтказишга қизиқиш билдирганди. Шунингдек, Ўзбекистон «Спутник-V» вакцинасининг 5000 дозасини ажратиш юзасидан Россиянинг тўғридан-тўғри инвестициялар жамғармасига мурожаат қилган.
Изоҳ (0)