Озарбайжон Қорабоғда Арманистоннинг икки мингдан ортиқ аскарлари ўлдирилгани ва яраланганини маълум қилди. Ереван бу Бокунинг бир кунлик йўқотишлари деб жавоб қайтарди

Тоғли Қорабоғда ҳарбий низо қайтадан бошланганидан буён Арманистон яраланган ва ўлдирилган 2300 нафаргача ҳарбийни йўқотди. Meduza’нинг ёзишича, бу ҳақда 30 сентябрь куни Озарбайжон мудофаа вазирлиги маълум қилган.

Вазирлик, шунингдек, Арманистоннинг 130 га яқин танклари ва бошқа зирҳли транспорт воситалари, 200 дан ортиқ артиллерия мосламалари, 25 га яқин ҳаво ҳужумидан мудофаа тизимлари, олтита қўмондонлик пунктлари ва бешта ўқ-дорилар омбори йўқ қилинганини таъкидлаган.

Арманистон томон бу маълумотни тасдиқламаган. Арманистон мудофаа вазирлиги матбуот котиби Шушан Степанян Facebook’даги саҳифасида «Озарбайжон ҳарбийлари ўзларининг сўнгги 24 соат ичида йўқотишларини арманларнинг ёқотишларига қўшиб ҳисоблаган», —  деб ёзган.

Тан олинмаган Тоғли Қорабоғ республикасининг маълум қилишича, жангда Арманистон томонидан 81 киши ҳалок бўлган, 120 нафар аскар яраланган.

Ереван маълумотларига кўра, жанговар ҳаракатлар бошлангандан буён Бокунинг 790 нафар ҳарбий хизматчиси ҳалок бўлган, 1,9 минг нафари яраланган. Шунингдек, Озарбайжоннинг 137 та танк, 72 та дрон, еттита вертолёт ва битта Ан-2 самолёти йўқ қилинган.

Озарбайжон томон ўзининг йўқотишлар ҳақида маълумот бермаган.

Тоғли Қорабоғда Озарбайжон ва Арманистон ўртасида ҳарбий низо 27 сентябрь куни қайтадан бошланди. Ҳар икки томон ҳам бир-бирини иғвогарона хатти-ҳаракатлар ва вазиятни кескинлаштиришда айбламоқда. Можаро кескинлашгани туфайли ҳар иккала мамлакатда ҳарбий ҳолат эълон қилинган.

Афғонистон Тоғли Қорабоғ можаросида Озарбайжонни қўллаб-қувватлади. Туркия ҳам Озарбайжонни жанг майдонида қўллаб-қувватлашга ваъда берди. Эрдўғон 27 сентябрь куни Озарбайжон президенти Илҳом Алиевга қўнғироқ қилиб, Туркия ҳар доимгидек бугун ҳам Озарбайжоннинг ёнида эканини айтган, шунингдек, «Озарбайжонга ҳужум қилган» Арманистонни қоралаб, уни босиб олинган ҳудудларни тарк этишга чақирган. Арманистон бош вазири жаҳон ҳамжамиятидан Туркиянинг Қорабоғ ишига аралашувига йўл қўймасликни сўради.

28 сентябрь куни Арманистон Туркиянинг F-16 қирувчиси унинг Су-25 самолётини уриб туширганини маълум қилди. Туркия эса буни рад этмоқда.