O‘zbekiston Ichki ishlar vazirligining Markaziy gospitali tomonidan O‘zbekiston Gimnastika federatsiyasining “Universal” sport majmuasida tashkil etilgan 750 o‘ringa mo‘ljallangan vaqtinchalik shifoxonada faoliyat olib borayotgan shifokor Ashurova Dilafruz Davronovna 2020-yil 18-sentabr kuni ijtimoiy tarmoq orqali O‘zbekiston Prezidentiga videomurojaat yo‘llagan. Ushbu holat yuzasidan IIV izoh berib o‘tdi.

Foto: IIV

Ma’lum qilinishicha, shifokor tomonidan yo‘llangan videomurojaatda u hech qanday asoslarsiz o‘zi faoliyat olib borayotgan vaqtinchalik shifoxonada bir nechta qonunchilikka zid bo‘lgan xatti-harakatlar sodir etilayotganligi haqida ma’lum qilgan edi. U ikkinchi videolavhasida ijtimoiy tarmoqlarda noto‘g‘ri ma’lumot tarqatib yuborganini tan olib, mazkur vaqtinchalik shifoxonada tibbiyot xodimlari uchun oziq-ovqat, turar joy bepul tashkil etilgani, ishlab turgan vaqtida hamkasblari bilan bo‘lgan suhbatlarda bunga amin bo‘lganini ta’kidlagan.

Shuningdek, ijtimoiy tarmoq foydalanuvchilari hamda shifoxona tashkilotchilaridan uzr so‘radi, ma’lumotlari noto‘g‘ri bo‘lganligi sabab o‘z istagiga ko‘ra qayta murojaat etayotgani haqida qo‘shimcha qildi.

Ta’kidlanishicha, O‘zbekiston Vazirlar Mahkamasining 461-son qaroriga muvofiq “Universal” sport majmuasida tashkil etilgan vaqtinchalik shifoxonada bemorlar belgilangan tartibda davolanmoqda.

O‘zbekiston Vazirlar Mahkamasining 2020-yil 4-avgustdagi 461-son “Koronavirus infeksiyasini yuqtirgan bemorlarga tibbiy yordam ko‘rsatish samaradorligini oshirish chora-tadbirlari to‘g‘risida”gi qarori talablariga muvofiq, Ichki ishlar vazirligining Markaziy gospitali huzurida O‘zbekiston Gimnastika federatsiyasining “Universal” sport majmuasida 750 o‘ringa mo‘ljallangan vaqtinchalik shifoxona tashkil etildi. Mazkur vaqtinchalik shifoxona Toshkent shahar Yunusobod tumani Ko‘rhoji ota ko‘chasi, 2 A-uyda joylashgan.

Vaqtinchalik shifoxonaga 2020-yil 2-sentabr kunidan koronavirus infeksiyasi bilan kasallangan bemorlarni qabul qilish boshlandi va shu kunga qadar o‘z faoliyatini tun-u kun davom ettirib kelmoqda.

Vaqtinchalik shifoxonada 3 smenada ish faoliyati tashkil etilib, unda jami 427 nafar tibbiyot xodimlari ishlamoqda, shundan 138 nafar shifokor, 154 nafar hamshira, 128 nafar kichik tibbiy hamda 7 nafar dezinfektor xodim faoliyat olib bormoqda.

Vaqtincha shifoxona tibbiyot xodimlari Jahon sog‘liqni saqlash tashkiloti hamda O‘zbekiston Sog‘liqni saqlash vazirligi tomonidan tayyorlangan “COVID-19 bilan kasallangan bemorlarni davolash bo‘yicha amaliy qo‘llanma” (7-bayonnoma)ga muvofiq davolash ishlarini amalga oshirib kelmoqda.

Vaqtinchalik shifoxonaga shu kunga qadar 5035 nafar bemor murojaat etgan bo‘lib, shulardan 1234 nafar bemorlarga tegishli tibbiy konsultatsiyalar berildi, 3801 nafar bemor shifoxonaga joylashtirildi, 2979 nafar bemor sog‘lig‘i yaxshilanganligi sababli uyiga javob berildi, ayni vaqtda esa shifoxonada 677 nafar bemor davolanmoqda.

Vaqtinchalik shifoxonada davolanayotgan bemorlar va faoliyat olib borayotgan xodimlarni ovqatlantirish, laboratoriya va diagnostika xizmatlari autsorsing xizmat ko‘rsatuvchi tashkilotlar tomonidan amalga oshirilmoqda.

Vaqtinchalik shifoxonani joriy saqlash, shuningdek, bemorlarni hamda jalb qilingan mutaxassis va boshqa xodimlarni oziq-ovqat mahsulotlari, dori vositalari, niqob, dezinfeksiya vositalari va boshqa zarur anjomlar bilan ta’minlash xarajatlari O‘zbekiston Vazirlar Mahkamasining 2020-yil 4-avgustdagi 461-son qaroriga muvofiq, O‘zbekiston Moliya vazirligi huzuridagi Inqirozga qarshi kurashish jamg‘armasi mablag‘lari hisobidan qoplanmoqda.

Avvalroq iyul oyi oxirida Toshkentda shahar hokimligi tomonidan “O‘zekspomarkaz”ning 3-pavilyonida 1000 o‘rinli, Mudofaa vazirligi tomonidan “O‘zekspomarkaz”ning 1—2-pavilyonlarida 814 o‘rinli, DXX tomonidan “Yoshlik” sport arenasida 520 o‘rinli, IIV tomonidan Yunusoboddagi Universal sport saroyi (Gimnastika majmuasi)da 750 o‘rinli Saralash va taqsimlash markazlari tashkil etilgani haqida xabar berilgan edi.

Foto: SSV

Shundan “Yoshlik” arenasida tashkil etilgan 520 koykali Saralash markazi bemorlar bilan batamom to‘lgani haqida xabar berilgandi.