Ўзбекистон ОАВлар ҳақиқий мустақиллигини яратиш бўйича мураккаб йўлни эндигина бошлаганини англаб турибди. Бу ҳақда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева 28 сентябрь куни бўлиб ўтган Ахборотдан эркин умумфойдаланишга бағишланган Халқаро онлайн-конференциядаги нутқида гапирди.
«Ўтган тўрт йил давомида кўп ишлар амалга оширилган бўлса-да, ҳали амалга оширилиши керак бўлганлари талайгина. Аммо, мамлакатимиз очиқлик, сўз ва ахборот эркинлигини таъминлаш, шунингдек, оммавий ахборот воситаларини ҳақиқий ‘тўртинчи ҳокимиятъга айлантиришни кўзловчи, ортга қайтмас йўлни танланганини яна бир бор таъкидлаб ўтишни истардим», — деган у.
Саида Мирзиёеванинг таъкидлашича, ахборотдан фойдаланиш имконияти ундан тенг фойдаланишни ҳам назарда тутади. У жинсий камситишга қарши курашиш имкониятини оширади. Аввалроқ Президент Шавкат Мирзиёев БМТ Бош ассамблеясининг 75-сессиясидаги нутқида гендер сиёсати мамлакат учун устувор масалага айланганини билдирган.
«Гендер тенглиги комиссиясининг аъзоси сифатида шуни таъкидлашни истардимки, ушбу мавзуни тўғри ёритиш зўравонликдан азият чеккан аёлларни ҳимоя қилишга ёрдам беради. Аёллар ўз ҳуқуқларининг ҳимоя қилиниши, камситилишга қарши кураш усуллари тўғрисида маълумот олишлари мумкин. Барча учун тенг имкониятлар тўғрисида жамоатчилик фикрини шакллантиришга айнан ОАВ жавобгардир», — деган Мирзиёева ва ОАВ мустақиллигини таъминлашга қаратилган ислоҳотлар давом этишини, бошланган очиқлик йўли ортга қайтмаслигини таъкидлаган.
Изоҳ (0)