Фарғона вилоятидаги секторлар, ташкилот ва бошқармалар раҳбарлари энди очиқлик асосида ишлайди, аҳоли билан юзма-юз мулоқот қилиш баробарида ижтимоий тармоқлар орқали ҳам мурожаатларни қабул қилади. Бу ҳақда Фарғона вилояти ҳокими вазифасини бажарувчи Хайрулло Бозоров илк бор вилоят фаоллари билан бўлиб ўтган йиғилишда маълум қилди, деб ёзмоқда ЎзА.
Вилоят раҳбари тадбиркорликни ривожлантириш, уларни ҳар томонлама қўллаб-қувватлаш, уларга кўмакчи ва елкадош бўлиш устувор вазифа сифатида белгиланганлигини қайд этиб ўтди.
Маълум қилинишича, вилоят, шаҳар ва туманларда «Тадбиркорлар уйи» ташкил этилиб, кичик бизнес ва хусусий тадбиркорликни янада ривожлантириш борасида аниқ чора-тадбирлар амалга оширилади.
ЎзАнинг ёзишича, Хайрулло Бозоров тадбиркорлар билан ишлаш, ҳудудларни обод этиш, аҳоли бандлигини таъминлаш, уй-жой қурилиши ва бошқа соҳаларда олиб борилаётган ишларнинг талаб даражасида эмаслигини мисоллар орқали кўрсатди.
Фарғона вилоятидаги Фурқат, Ёзёвон ва Қўштепа туманларида тадбиркорлик ривожи «қониқарсиз» деб топилган. Айни кунларда мазкур ҳудудлардаги муаммоларни ҳал этиш тадбирлари ишлаб чиқилмоқда. Камбағалликни қисқартириш, эҳтиёжманд оилалар учун даромад манбайини топишга ёрдам бериш барча сектор раҳбарларининг кундалик иш тартибидан жой олиши кераклиги таъкидланди.
«Дастлаб Фарғона, Қўқон шаҳарларида «халқ назорати» платформасини ишга туширишни режалаштирганмиз. Аҳоли учун бу мулоқот майдони бўлади. Улар ҳудуддаги муаммоларни бемалол айта олсин. Мутасадди раҳбарлар эса уларни ҳал этиш чораларини кўриши лозим. Шунингдек, матбуот ва ижтимоий тармоқларда холис, асосли танқид бўлса, биз бемалол қабул қиламиз», — дея таъкидлаган Хайрулло Бозоров.
«Шунингдек, вилоят ҳокими таълим, тиббиёт, маҳалла, қишлоқ хўжалиги каби соҳалардаги мавжуд ҳолатни чуқур таҳлил қилди. Шаҳар ва туман студияларида иштирок этган фаолларнинг вилоятни ижтимоий-иқтисодий ривожлантиришдаги устувор мақсад ва вазифаларни амалга оширишда муҳим ўрни бор эканлиги таъкидлаб ўтилди», — дейилади ЎзА хабарида.
Эслатиб ўтамиз, Фарғона вилояти собиқ ҳокими Шуҳрат Ғаниев Ўзбекистон бош вазирининг аграр ва озиқ-овқат соҳаларини ривожлантириш масалалари бўйича ўринбосари этиб тайинланганди. Шу сабабли у Фарғона вилояти ҳокими лавозимидан озод этилган.
Шуҳрат Ғаниевнинг ўрнига шу пайтга қадар Наманган вилояти ҳокими сифатида ишлаб келган Хайрулло Бозоров Фарғона вилояти ҳокими вазифасини бажарувчи этиб тайинланди.
Изоҳ (0)