AQSh prezidenti Donald Tramp 10 yildan beri federal daromad solig‘ini to‘lamaydi, deb xabar bermoqda The New York Times’ga tayanib “RBK”.
The New York Times Trampning 20 yildan ortiq soliq deklaratsiyalari, shu jumladan, uning biznes imperiyasini tashkil etuvchi yuzlab kompaniyalar to‘g‘risidagi ma’lumotlarni o‘rganib chiqqan.
“So‘nggi 10 yil ichida u hech qanday daromad solig‘i to‘lamagan. Avvalroq u daromaddan ko‘ra ko‘proq zarar ko‘rayotganini aytgandi”, – deyiladi nashr xabarida.
Tramp 2016-yilda faqatgina 750 dollar daromad solig‘ini to‘lagan. 2017-yilda ham u to‘lagan soliq miqdori ayni shunchani tashkil etgan.
Nashrning ta’kidlashicha, 2018-yilda prezident “O‘quvchi” realiti-shousidagi ulushidan va o‘z ismidan foydalanish huquqi uchun qariyb 427 million dollar ishlab olgan. Shu bilan birga, ikkita ofis binosiga muvaffaqiyatli sarmoya kiritgani sabab 176,5 million dollar daromad qilgan. Faqatgina ushbu daromadlar uchun Tramp 100 million dollardan ko‘proq soliq to‘lashi kerak edi, deb qayd etadi The New York Times.
Tramp NYT nashridagi ma’lumotlarni yolg‘on deb atadi.
“Bularning barchasi soxta xabarlar. Aslida men soliq to‘layman”, – dedi prezident. Trampning ta’kidlashicha, hozirda uning soliq deklaratsiyalari qayta ko‘rib chiqilmoqda.
“Agar mening 108 sahifalik deklaratsiyamni ko‘rib chiqsangiz, ko‘proq narsani bilib olasiz. Men buni jamoatchilikka yetkazishni kutmoqdaman. Odamlar esa haqiqatan ham hayratda qoladi”, – dedi Tramp.
The New York Times avvalroq ham Trampni soliqlarni to‘lashdan bo‘yin tovlashda ayblagan edi. 2019-yil may oyida nashr 1985-yildan 1994-yilgacha uning biznesi 1,17 milliard dollar zarar ko‘rgan, deb yozgan edi. Bu zarar Trampga sakkiz yil davomida daromad solig‘ini to‘lamaslikka yordam bergan.
Izoh (0)