Наманган вилояти ҳокими вазифасини бажарувчи Шавкатжон Абдураззоқов фаолиятининг илк кунида Наманган шаҳридаги коронавирусни даволашга ихтисослашган шифохоналар билан танишди. Бу ҳақда «Дарё» мухбири Азизбек Абдувалиев хабар бермоқда.
Вилоят раҳбари Наманган шаҳридаги 2-БЎСМ биносида жойлашган саралаш ва тақсимлаш марказида бўлди. Бу ерда махсус кийим-бош кийиб, палаталарни бирма-бир айланди, беморлар ҳолидан хабар олди.
Мазкур марказда даволанаётган Уйчи тумани тез тиббий ёрдам бўлими ходими Робия Оғалиқова ҳоким билан мулоқоти чоғида икки фарзанди олий ўқув юртида тўлов-контракт асосида таҳсил олаётганини айтиб ўтди. Шавкатжон Абдураззоқов мутасаддиларга шартнома пуллари тўловини амалга оширишда кўмак беришни топширди.
Шунингдек, вилоят раҳбари марказ ходимлари билан суҳбатлашиб, бу ерда тўлақонли фаолият олиб бориш учун қандай ёрдам зарурлигини сўради. Муаммо ва таклифларни тинглаб, уларни бартараф этиш юзасидан кўрсатмалар берди.
Шавкатжон Абдураззоқов вилоят соғлиқни қайта тиклаш марказида Наманганга коронавирусни бартараф этишда кўмак бериш учун келган бир гуруҳ россиялик шифокорлар билан учрашди. Касалликни самарали даволаш борасидаги фикрлари билан қизиқиб, шифохоналардан бирини уларнинг тавсиялари асосида қайта жиҳозлаш зарурлигини таъкидлади.
Изоҳ (0)