Ўзбекистон Ички ишлар вазирлиги Вазирлар Маҳкамасининг «Йўл ҳаракати хавфсизлиги соҳасидаги ҳуқуқбузарликларга қарши курашиш самарадорлигини оширишга доир қўшимча чора-тадбирлар тўғрисида»ги қарорига ўзгартириш ва қўшимчалар киритиш ҳақида қарори лойиҳасини муҳокамага қўйди.
Унга кўра, йўл ҳаракати қоидаларининг бузилишини қайд этишда ҳар қандай видеотехника ва мобил қурилмалардан фойдаланиш таклиф этилмоқда.
Ҳужжат билан ҳукуматнинг 2018 йил 20 сентябрдаги қарорига ўзгартириш киритилиши назарда тутилган. Вазирлар Маҳкамасининг ушбу қарорида жисмоний ва юридик шахслар ЙҲХББга фақатгина автомобиль видеорегистраторлар томонидан ёзиб олинган йўл ҳаракати қоидаларининг бузилиши борасидаги видеоларни юборишлари мумкин.
Агарда мазкур ўзгартириш қабул қилинса, ҳар қандай видеоқурилма ва мобил телефонларда тасвирга олинган қоидабузарликлар ҳақида хабар бериш мумкин бўлади.
Маълумот учун, ҳозирда ЙҲХББнинг Dyhxx.ejarima.uz махсус сайти фақат видеорегистраторлардаги ёзувларни қабул қилмоқда. Шу билан бирга, қоидабузарлик содир этилганига уч кундан ва видеонинг давомийлиги 120 сониядан ошмаслиги керак. Шунингдек, уларда содир этилган қоидабузарликнинг санаси ва вақти кўратилган бўлиши лозим.
Эслатиб ўтамиз, содир этилган ҳар бир йўл ҳаракати қоидасининг бузилиши борасидаги юборилган видеоёзув учун БҲМнинг 5 фоизи миқдорида мукофот пули берилади. Сайт статистикасига кўра, бугунга қадар 12,5 минг фойдаланувчи 160 мингга яқин қоидабузарлик ҳақида хабар берган.
Лойиҳа муҳокамаси 4 ноябрга қадар давом этади.
Эслатиб ўтамиз, 2018 йилдан Тошкент автобусларига синов тариқасида видеорегистратор ва камералар ўрнатилиши бошланган.
Изоҳ (0)