«Ҳудудгазтаъминот» компанияси 24 сентябрь куни ижтимоий тармоқларда Андижонда «Технопарк» компаниясининг ақлли газ ҳисоблагичи портлагани ҳақида тарқалган хабарларга муносабат билдирди.
«Ўрнатишдан 2,5 соат ўтгач портлади. Яхшиям ҳеч ким жабрланмади. Парчаси кўзга кириб кетса нима бўлар эди? Ёки газ сизиб чиқиши сабабли каттароқ портлаш содир бўлганда-чи?» — деб ёзди Facebook фойдаланувчиси.
«Ҳудудгазтаъминот» компаниясининг «Ҳудудгаз Андижон» газ таъминоти филиали маълумотларига таяниб маълум қилишича, Андижоннинг Шимолий кичик даҳа 77-уйдаги хонадонда газ тармоқлари ва ускуналарининг нотўғри эксплуатацияси натижасида келиб чиққан техноген тусдаги фавқулодда ҳолат содир бўлган.
«Дастлабки тахминларга кўра, ҳисобга олиш ускунаси ичида содир бўлган газ-ҳаво аралашмаси чақнаши унинг бузилишига олиб келган. Мазкур участкага газ ҳисоблаш ускунаси ўрнатилгунга қадар газ қувурига атмосфера ҳавосининг тушиши газ ускунаси ва газ тармоғи ичида ҳаво-газ аралашмаси юзага келишининг эҳтимолий сабаби ҳисобланмоқда. Жумладан, қўшни хонадонларда (учта хонадонда) газ тармоқлари учун мўлжалланмаган резина шланглар улангани аниқланган», — дейилади хабарда.
Компания тармоқда босим ошиб кетгани сабабли ҳисобга олиш ускунаси бузилган бўлиши мумкинлиги ҳақидаги тахминни рад этган.
«Ҳудудгазтаъминот» барча табиий газ истеъмолчиларини газ ускуналари ва уй ичидаги газ тармоқларини техник кўрикдан ўз вақтида ўтказиш, табиий газдан фойдаланиш қоидаларини бузмаслик, ностандарт газ ускуналари ва шланглардан фойдаланмасликка чақирган.
Эслатиб ўтамиз, шу йилнинг март ойидан газни ҳисобга олиш ускунаси ва унга боғлиқ харажатлар (ўрнатиш, олиб ташлаш, текшириш, таъмирлаш) газ таъминоти ташкилотлари томонидан қопланиши ва истеъмолчилар фақат унинг хавфсизлиги учун жавобгар бўлиши тўғрисида хабар берилганди.
Изоҳ (0)