«Темир дафтар»га сохта маълумот киритиб, эҳтиёжмандларга хайрия сифатида тарқатиладиган пулларни ўзлаштирган ҳокимлик ходими жавобгарликка тортилди. Бу ҳақда «Дарё»га Бухоро шаҳар Маъмурий суди раиси Руслан Заиров маълум қилди.
Таъкидланишича, фуқаро Ж.Р. Бухоро шаҳар ҳокимлигида ҳудудларни комплекс ижтимоий-иқтисодий ривожлантириш бўйича сектор котиби вазифасида ишлаб келиб, Президент фармонига кўра эҳтиёжманд оилаларга берилиши лозим бўлган моддий ёрдам маблағларининг тарқатилишига масъул этиб белгиланган.
Вазиятдан фойдаланишга уринган сектор котиби Бухоро шаҳридаги «Тўқимачи» МФЙ ҳудудида яшовчиларнинг «темир дафтари»га ушбу маҳаллада яшамаётган ва рўйхатга олинмаган фуқаро Н.Т. ва унинг 8 нафар оила аъзосини моддий ёрдам тўлови қайдномасига қўшган. Бу пайтда «Тўқимачи» МФЙ раиси бетоблиги сабаб таътилда бўлган. Унинг ўринбосари Ш.Х. маҳалла раиси вазифасини бажариб турган.
Ш.Х. ҳокимлик масъулига сохта тўлов қайдномасига имзо қўймаслигини, бу ҳаракати учун жавобгарлик борлигини билдирган. Ж.Р. эса пулларни харажатлари учун олганини айтиб, тўлов қайдномасига имзо қўйиб беришини талаб қилган. Бирор муаммо юзага келса, ушбу ҳолат учун ўзи жавоб беришини ва бу каби ҳолатлар барча маҳалла фуқаролар йиғинларида содир бўлаётганини билдирган.
Шундан сўнг Ш.Х. масъулнинг оғзаки топшириғига асосан, фуқаро Н.Т.нинг номига ёзилган 1 миллион 600 минг сўм ёрдам пули тўловини ёзган. Тўлов қайдномасига ушбу пул маблағи берилганлиги ҳақида сохта маълумот киритган. Ж.Р. эса ушбу пулларни шахсий эҳтиёжлари учун сарфлаб, уларни ўзлаштириш йўли орқали талон-торож қилган.
Бухоро шаҳар Маъмурий судида «Тўқимачи» МФЙ раиси ўринбосари Ш.Х. Бухоро шаҳар ҳокимлиги сектор котибининг ҳаракатларидан норози бўлиб тегишли ташкилотларга мурожаат қилмагани, бироқ ўзлаштирилган маблағдан манфаатдор бўлмагани, маҳаллада бошқа фуқароларга моддий ёрдам пуллари тўғри ва тўлиқ тарқатилгани инобатга олиниб, унга нисбатан базавий ҳисоблаш миқдорининг иккидан бир қисми, яъни 111 минг 500 сўм жарима жазоси тайинлаган.
Судда сўз олган сектор котиби пулни талон-торож қилмагани ҳақида асоссиз важлар келтирган бўлса-да, тарафларнинг кўрсатмалари, ишда мавжуд текшириш далолатномаси ва унга илова қилинган ҳужжатлар, ариза, тушунтириш хатлари ҳамда тасдиқланган далиллар унинг айбдорлигини исботлаган. Шунга кўра суд фуқаро Ж.Р. томонидан талон-торож қилинган 1 миллион 600 минг сўм маблағни давлат фойдасига ундириб, айбдорга нисбатан базавий ҳисоблаш миқдорининг икки баравари — 446 минг сўм жарима жазоси тайинлаган.
Изоҳ (0)