Наманган шаҳар ҳокимлиги мажлислар залида 25 сентябрь куни вилоят фаоллари йиғилиши бўлиб ўтган. Унда Президент администрацияси раҳбари Зайнилобиддин Низомиддинов ва Ўзбекистон бош вазири Абдулла Арипов қатнашган.
Йиғилишда ташкилий масала кўрилган. Шу вақтгача Наманган вилоятига ҳокимлик қилиб келган Хайрулло Бозоров бошқа ишга ўтганлиги муносабати билан вилоят ҳокими лавозимидан озод этилгани тўғрисидаги Президент фармони ўқиб эшиттирилган.
«Давлат раҳбари фармони билан Ўзбекистон Экология ва атроф-муҳитни қўмитаси раиси бўлиб ишлаб келган Шавкатжон Абдураззоқов Наманган вилояти ҳокими вазифасини бажарувчи этиб тайинланди», — дея хабар бермоқда «Дарё» мухбири.
Аввалроқ Фарғона вилояти ҳокими Шуҳрат Ғаниев Ўзбекистон бош вазири ўринбосари этиб, унинг ўрнига шу вақтгача Наманган вилоятига ҳокимлик қилган Хайрулло Бозоров Фарғона вилояти раҳбари бўлиши кутилаётгани ҳақида хабар берилган эди.
44 ёшли Шавкатжон Абдураззоқов 2020 йил мартида Экология ва атроф-муҳитни муҳофаза қилиш давлат қўмитаси раиси этиб тайинланган эди. Бунгача у салкам уч йил Наманган шаҳар ҳокими, 2015—2017 йилларда эса Наманган тумани ҳокими сифатида ишлаган.
Изоҳ (0)