КХДР раҳбари Ким Чен Ин Сариқ денгизда вафот этган Жанубий Корея фуқароси сабаб қўшни мамлакат халқидан кечирим сўради. Бу ҳақда Сеулга Пхеняндан келган расмий мактубга таяниб, Yonhap агентлиги хабар берди.

Фото: EADaily

Мактубда ёзилишича, КХДР етакчиси Жанубий Корея президенти ва мамлакатнинг бошқа фуқароларига пандемия оқибатларини бартараф этишда ёрдам бериш ўрнига, уларни қаттиқ хафа қилиб қўйганидан афсусда.

Аввалроқ КХДР Жанубий Корея фуқароси бўлган амалдорни ўлдириш ва унинг мурдасини ёқиб юборишда айбланганди. Жанубнинг версиясига кўра, 47 ёшли амалдор 21 сентябрь куни Ёнпхёндо ороли яқинида инспекция ўтказаётган катер бортидан йўқолиб қолган. Тахминларга кўра, у КХДРга қочишга уриниб, мамлакат территориал сувлар орқали сузиб кетган. 22 сентябрь куни кечаси Шимолий Корея патрули уни пайқаб қолиб, отиб ташлаган. Шундан сўнг олий қўмондонлик буйруғи билан марҳум танаси оролда ёқиб юборилган.

Шимолий Корея содир бўлган воқеа бўйича ўз версиясини тақдим этган. Пхенян маълумотларига кўра, қонунбузар чегарачиларнинг оғзаки буйруқларига ҳеч қандай жавоб қайтармаган. У қочишга уринганидан, патруль 40-50 метр оралатиб 10 мартадан ортиқ ўқ узган. Шундан сўнг, патруль қайиқни кўзган кечирган: қонга бурканган қайиқда ҳеч кимнинг жасади бўлмаган. Шу сабабли кема COVID-19 тарқалишининг олдини олиш бўйича миллий штаби директивасига кўра ёқиб юборилган.

Бу 2008 йилдан буён КХДРда Жанубий Корея фуқаросининг ўлдирилиши билан боғлиқ биринчи ҳолат ҳисобланади.

Эслатиб ўтамиз, июнь ойининг бошларида Шимолий ва Жанубий Корея муносабатлари ёмонлашганди. 14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларни амалга оширишга чақирди. 16 июнь куни эса Шимолий Корея ҳарбийлари Кэсон шаҳрида жойлашган Кореялараро алоқа офисини портлатиб юборди.