Туркия тиббиёт ассоциацияси (ТТБ) коронавирус инфекциясининг тарқалишига боғлиқ вазият сезиларли даражада ёмонлашиши мумкинлигини маълум қилди. Бу ҳақда ТТБ видеоанжумани якунига таяниб, Deutsche Welle хабар берди.
ТТБ аъзоларининг баёнотида айтилишича, улар агарда тегишли чеклов чоралари кўрилмаса, куз фаслида касаллар сонининг ортиш хавфи ҳақида огоҳлантирган. Эндиликда экспертларнинг таъкидлашича, мамлакатни «цунами» кутмоқда, чунки мавсумий касаллик вақтида у юқори даражага чиқади.
Мутахассисларнинг таъкидлашича, карантин борган сари ваҳима туғдирмоқда. Уларнинг фикрича, бунга Туркия ҳукумати жавобгар, чунки улар коронавирус тарқалишига қарши кураш борасида ўз вақтида чора кўрмаган. Бундан ташқари, экспертлар инфекцияга чалинишга оид фактларнинг яширилишида ҳам ҳукуматни айблаган.
Сентябрь ойи бошларида Туркия соғлиқни сақлаш вазири Фахриддин Кожа мамлакат коронавирус инфекцияси тарқалишининг иккинчи тўлқинини бошидан ўтказаётганини маълум қилганди. Ўшанда вазир касаллар сонининг ортишига дам олувчилар профилактика чораларига яхши риоя қилмаётганини сабаб қилиб кўрсатган.
Эслатиб ўтамиз, 17 сентябрь куни Республика махсус комиссияси қарори асосида хорижий давлатлардан авиа, темир йўл ва автотранспорт воситаси орқали Ўзбекистонга келувчи шахсларни қабул қилишнинг янги тартиби жорий этилган. Туркия ушбу рўйхатда «қизил» зонага кирувчи давлатлар қаторидан ўрин олган.«Қизил» давлатлардан кириб келаётган шахслар сўнгги 72 соат давомидаги коронавирусга ПЗР тести манфий натижалари тўғрисида маълумотнома тақдим этган ҳолда Ўзбекистон ҳудудига киритилади.
Агар шахс сўнгги 72 соат ичида коронавирусга тест топширмаган бўлса ёки шахсда коронавирус инфекциясининг аломатлари (йўтал, иситма ва б.қ.) мавжуд бўлса, Ўзбекистонга келганидан сўнг ўтказиш пункти (аэропорт, вокзал ёки бошқа) ҳудудида ўз ҳисобидан коронавирусга ПЗР ёки экспресс-тест ёхуд антиген текширувидан ўтади ҳамда Ўзбекистон ҳудудига киритилиб, 14 кунга меҳмонхонага ёки уй карантинига юборилади.
Изоҳ (0)