Шотландиянинг Бонхилл шаҳрида яшовчи эркак бутерброддан тушган помидор туфайли тойиб кетди ва оёғидан айрилди. Бу ҳақда The Mirror нашри хабар берди.
2020 йил 11 июль куни 65 ёшли ижтимоий хизмат ходими, нафақахўр Малколм Уайт 53 ёшли турмуш ўртоғи Иванна билан боғ ичида бўлган.
«Иванна бирор нарса тановул қилишимни сўради, шунда мен гўштли бутерброд хоҳлашимни айтдим. У дарров тайёрлаб берди, мен нимагадур бутерброд билан уйга қайтдим. Шунда бутерброднинг ичидан помидор бўлаги тушиб кетди ва мен унга тойиб, оёқ бармоғимни жароҳатладим», − дейди Уайт.
У йиқилганидан сўнг ўрнидан туришга муваффақ бўлди, аммо унинг бармоғи қорайиб кетган эди. Шифокор кўригидан ўтганда бармоқнинг сингани маълум бўлди. Кейинги қабул душанба кунига белгиланди, аммо бармоқдаги қорайиш тобора ёйилиб борди. Бу ҳолат Иваннани хавотирга қўйди ва шифокорга мурожаат қилди.
«Кейин эса 4 кун жонлантириш бўлимида ётганимдан сўнг уйғонганимни эслай оламан», − дейди шотландиялик эркак. Маълум бўлишича, унинг оёғида тромблар пайдо бўлиб, қон айланишини тўсиб қўйган. Шу сабабдан тери қорайиб кетган. Шифокорлар қон қуйқаларини олиб ташлашга қанчалар уринмасин, аммо натижа бўлмаган. Жарроҳ Уайтга зарарланган оёғини тиззасидан кесиб ташлаши ёки бунинг охири ўлим билан якунлаши ҳақида хабар берган. Шундай қилиб, унинг оёғини кесишга тўғри келган.
Бўлиб ўтган воқеадан сўнг Уайтнинг ҳаёти ўзгарди. Аввал у уйида камдан кам бўларди. «Футбол учун пул тикиш ва дўстлар билан учрашиш учун доимо қаҳвахоналарга бориб турардим. Ҳамма билган барларга бордим. Мана энди уйдан ҳам чиқа олмайман», − дейди у.
Уайтнинг рафиқаси ҳамиша унга ғамхўрлик қилади. Аммо вазият улар яшайдиган уй ногиронлар учун мослашмаганлиги сабабли қийинлашмоқда.
«Деярли саккиз ҳафтадан буён уйдаман, биз меҳмонхонада яшаяпмиз, чунки ётоқхона ва ҳаммом учун юқорига кўтарила олмайман. Шу хонада овқатланамиз, ухлаймиз, барчаси мен учун қулай бўлиши керак. Ачинарлиси, чўмилишга ҳам қодир эмасман, турмуш ўртоғим ҳар куни мени шу ерда ювинтиради. Уйдан чиқишим ҳам қийин, бунинг учун зинадан пастга тушиш керак. Ҳаракатлардан мутлақо чекланганман», − дея тушунтиради эркак.
Уайт яшаб турган уйни шароитига мослаштириш ёки унга янги уй бериш тўғрисида илтимос билан Графлик кенгашига мурожаат қилган, аммо улар бунинг иложи йўқлигини маълум қилган. Шунингдек, маҳаллий раҳбарият беморга унга мос бўлган уй-жой тўғрисида хабар беришини айтиб ўтган.
Изоҳ (0)