Малларанг «манчкин» зотига мансуб мушукнинг исми Фат Сян, у хитойчада «омадли» деган маънони англатади. Бу тахаллус унга жуда мос келади, сабаби унинг куни бўйи ухлашига ҳеч ким халақит бермайди.
Тайванлик Жесси исмли тиш шифокори 4 йил аввал Фат Сянни кўчадан топиб олган. Мушук ўшанда ҳам ҳозиргидек соғлом кўринмаган. Кичкина ва нимжон мушук кўчанинг бошқа мушуклари билан жангда ўзини ҳимоя қила олмай, жароҳат олган эди. Бундан ташқари, Фат Сянга мушукларнинг иммунитет танқислиги вируси – ОИВга ўхшаш касаллик ташхиси қўйилган.
Мушук янги уйида қаергадир яшириниб, 16-20 соатлаб ухлайди. Бундан хавотирга тушган уй эгаси мушукни тиббий текширувдан ўтказди. Маълум бўлишича, Фат Сяннинг соғлиғида муаммо йўқ, иммунитет танқислиги вируси бундан мустасно. Шифокорлар мушук кўчадаги оғир ва машаққатли ҳаётдан чарчаган, энди эса шунчаки дам олмоқчи, деган хулосага келган.
Шундан сўнг Жесси мушукни ўз ҳолига қўйишга қарор қилди. Энди мушук ўзи орзу қилгандек ҳаёт кечирмоқда. У тик туриб, ётиб, турли ҳолатларда ухлайди. Мушук уйқуга кетганида ҳеч нарсани сезмайди, ҳатто Жесси унинг тирноқларини олаётганида ҳам уйғонмайди. Уйқудан уйғонган мушук бироз сайр қилади, овқатлангандан сўнг яна уйқуга кетади.
Жесси ўзининг ғайриоддий мушугини бошқалар ҳам билиши учун ўзининг Facebook саҳифасини яратди, ҳозирда унга 28 мингдан ортиқ киши обуна бўлган. Жесси саҳифага Фат Сян ва хитойчада «хушбичим» деган маънони англатувчи Шуай исмли мушук билан тушган сурат ва видеоларини жойлаштириб боради.
Шунингдек, у саҳифани ҳазил тариқасида «Югур, Сян!» деб номлаган, сабаби унинг мушуги узоқ муддатлик дам олишдан сўнг кучга тўлган. Аммо уйқучи мушукнинг мухлислари унинг саҳифасига берилган ном устида тез-тез тортишади, чунки ҳали ҳам ухлашда давом этаётган мушукка қараб унинг югуришига ишониш қийин.
Изоҳ (0)