АҚШ Миллий хавфсизлик агентлигининг собиқ ходими Эдвард Сноуден «Шахсий иш» номли китоби нашр этилишидан ва жамоат олдида чиқишларидан тушган 5 миллион доллардан ортиқ пулни АҚШ ҳукуматига тўлашга рози бўлди. Бу ҳақда CNN хабар берди.
АҚШ ҳукумати китобнинг нашр этилиши Сноуден Америка разведка хизматларида ишлаган пайтида имзолаган махфийлик тўғрисидаги келишувнинг бузилишига сабаб бўлганлигини таъкидлаб, ушбу маблағларни ундиришни суд орқали талаб қилган.
CNN’да қайд этилишича, Сноуден китобдан 4,2 миллион доллар, бир неча ўнлаб чиқишларидан яна 1,03 миллион доллар олган. Ушбу чиқишларда ҳам у махфийлик тўғрисидаги келишувни бузган.
АҚШда махфий маълумотларни ошкор қилганлиги учун Сноуденни 30 йиллик қамоқ жазоси кутмоқда — 2013 йилда у Миллий хавфсизлик агентлиги ва Марказий разведка бошқармасининг Америка фуқароларини кузатиб борган махфий дастурини оммага ошкор қилган. Ҳозирда Сноуден Россияда яшайди.
«Шахсий иш» китоби 17 сентябрдан сотувга чиққан. Унда Сноуден кузатув тизими тўғрисида оммага ошкор қилишига нима ундагани ҳақида гапириб берган.
Аввалроқ Эдвард Сноуден Telegram’ни хавфли, деб атаб, ундан фойдаланмасликни тавсия қилгани хабар берилган эди.
Изоҳ (0)