Airbus 2035 йилгача зарарли чиқиндиларни деярли чиқармайдиган водородда учувчи самолёт ишлаб чиқариш режаси борлигини эълон қилди

Airbus концерни зарарли чиқиндиларни деярли чиқармайдиган дунёдаги биринчи ZEROe тижорий самолётининг учта концепциясини тақдим этди. Энергия манбаси сифатида водород қўлланилади, компания мазкур ёнилғини авиацион нуқтаи назар энг тоза ва келажаги порлоқ деб ҳисобламоқда. Airbus водород технологиялари ҳозирги суръатларда ривожланишда давом этса, ушбу самолётнинг биринчи парвози 2035 йилда амалга оширилишини прогноз қилган.

Самолёт концептлари модификациялашган газ трубина двигателлари билан жиҳозланган. Дастлабки нусхада — иккита турбовентилятор двигателлари билан таъминланган — ташқи кўриниши классик йўловчи самолётга ўхшаб кетади. Учоқ 120-200 нафаргача йўловчига мўлжалланган ва 3700 километр масофага уча олади.

Иккинчи концепт нусхада ҳам иккита турбовинтли двигатель мавжуд. Самолёт 100 кишининг узоғини яқин қила олади ва 1850 километр масофагача учиши мумкин.

Учинчи концепт — аралаш қанотли конструкция, бунда қанот лайнер корпуси билан уйғунлашиб кетган. Биринчи концептдаги лайнер каби ушбу учоқ ҳам 200 нафаргача йўловчини сиғдира олади ва 3700 километр масофагача учади. Кенг фюзеляж (самолёт корпуси) водород сақлаш ва уни тақсимлашда, самолёт салони тузилмасини тузишда ҳам асқатади, дейилган Аирбус пресс-релизида.

Аирбус президенти Гийом Форининг сўзларига кўра, ушбу концептлар компанияга табиатга зарарли чиқинди чиқармайдиган самолёт дизайни ва тузилишини ўрганиш ҳамда такомиллаштиришда қўл келади. Концерн раҳбарининг фикрича, асосий энергия манбаси сифатида водородга ўтиш авиацион экотизимда барчадан қатъий қарорлар қабул қилишни талаб этади. Бунинг учун давлатлар ҳукуматлари авиацион ёнилғини тадқиқ этиш ва кенг миқёсда фойдаланилишини таъминлаш учун маблағ ажратиши, аэропортлар эса водород етказиб бериш ва самолётларни у билан таъминлашда инфратузилмани кенгайтириши лозим.

Яқин беш йил ичида Airbus инженерлари водород технологияларини ишлаб чиқиш билан шуғулланади. Бир неча ойдан кейин водород ёнилғиси элементларининг синовлари ва водород ёниш технологияси тестлари бошланади. 2025 йилга бориб компания ZEROe авиақурилиш дастурини ишга туширади, самолётнинг тўлиқ прототипи 2030 йилгача тақдим қилиниши кутилмоқда.