Дивя Бҳарти ёрқин, аммо қисқа ҳаёт кечирган Болливуднинг шоу-бизнес вакили ҳисобланади. Кино оламидаги 4 йиллик фаолияти давомида 21 та фильмда роль ўйнаб машҳурликка эришган ва мухлислар қалбидан жой олган актриса ҳақида маълумот бериб ўтамиз.
Дивя Бҳарти 1974 йил Мумбайда дунёга келган. 14 ёшлигидаёқ фильмда суратга тушишга таклиф қилинган Дивя, 1990 йилда «Boobili Rafa» фильмида дебют ролини ижро қилган. Телетомошабинлар мазкур фильмда кичик Шридевини кўргандек бўлган. Кейин «Коинот қалби» фильмида суратга тушган, аммо фильм кинопракатларга чиқмаган. Шунга қарамай, унда актриса ижро этган рақс олтин фонддан ўрин олган.
https://youtu.be/OaZv5Ew4NvM
Бир йил ўтиб Чиранживи билан биргаликда суратга тушган икки фильмининг премьераси бўлиб ўтган. Ушбу фильмлар мухлислар томонидан илиқ қабул қилинган ва 17 яшар Бҳарти энг кўп ҳақ тўланадиган актрисалардан бири бўлган.
1992 йилда у «Уч жаҳлдор эркак» фильмида суратга тушади, фильм унчалик машҳур бўлмагани билан ундаги «Saat Satunda» қўшиғи хит бўлган. 1992 йилда суратга олинган «Девона» фильмида Риши Капур ва ҳали машҳур бўлиб улгурмаган Шохруҳ Хон билан бирга роль ижро қилади.
Ушбу фильмдаги роли сабаб Дивя «Фильмфаре» мукофотини қўлга киритади. «Чақмоқ ва Шабнам« фильмининг суратга олиш жараёнида актриса бўлажак турмуш ўртоғи Сажид Надиалвала билан танишади ва жуфтлик 1992 йилда хуфиёна турмуш қуради.
Гўзаллиги, истеъдоди ва меҳнатсеварлигига қарамай, оғир феъл-атвори сабаб киносаноатда ҳамма ҳам уни яхши кўравермаган. Актриса 1993 йил 5 апрелда кўп қаватли уйнинг бешинчи қаватидан ўзини ташлаб, 19 ёшида ҳаётдан кўз юмган. Унинг ўз жонига қасд қилиши сабаби аниқ бўлмаса-да, турли тахминлар йўқ эмас.
Уларнинг бирига қараганда, актрисанинг турмуш ўртоғи Сажид мафия гуруҳларидан бирининг аъзоси бўлган. У бир неча марта турмуш қурган бўлган ва ёш Дивяни унга эрга тегишга мажбур қилган. Шу туфайли ҳам уларнинг оила қургани актриса ҳаёти ўлим билан якун топмагунига қадар эълон қилинмаган. Дивя номидан шартномалар имзолаб, гонорарларни чўнтагига ургани ва унга қўл кўтаргани актриса ўзини бахтсиз ҳис қилишига сабаб бўлган. Қаттиқ депрессияга тушган актриса, спиртли ичимликлар кейинчалик гиёҳванд моддаларга боғланиб қолган. Вафотидан аввал Бҳарти ичган бўлган ва қўшнилари уни тақдири ва ҳаётидан нолиб бақирганини эшитган. Маст ҳолда ўзини бошқара олмаган актриса деразадан ўзини ташлаган.
Бошқа бир версияда эса актрисанинг турмуш ўртоғи уни ҳаддан ортиқ яхши кўргани ва унинг ўлимидан кейин анча вақтгача ўзига кела олмагани айтилади. Таъкидланишича, Сажид турмуш қурса ҳам Дивяни унута олмаган, суратга олган фильмларини унга атаган. Буларнинг қай бири ҳақиқат экани эса номаълум. Дивя Бҳарти келинлик либосида минглаб мухлислар қуршовида сўнгги манзилга кузатилган.
Изоҳ (0)