9 фасл, 2137 қисмдан иборат «Санта-Барбара» сериали 1984 йилдан Америкада суратга олина бошлаган. Йиллар давомида намойиш этилган энг узун сериал Майкл Глион, Рик Бенневиц ҳамда Норман Холл каби режиссёрларнинг ижодий маҳсули ҳисобланади.
Сериал воқеалари Калифорниянинг Санта-Барбара шаҳрида яшовчи турли қатламдаги тўртта оила атрофида бўлиб ўтади. Картина суратга олингандан буён орадан 36 йил ўтди, хўш, унда иштирок этган актёрлар қай даражада ўзгарди, уларнинг ҳаёти қандай давом этди? Бугун ушбу саволларга жавоб излаймиз.
Келли Кепвелл — Робин Райт
Сериал намойишидан сўнг муваффақиятли карьерага эга бўлган ҳамда АҚШдан ташқарида ҳам машҳурликка эришган актриса «Карталар уйи» сериалидаги роли учун «Олтин глобус» мукофотига сазовор бўлди. 2017 йил «Мўъжиза аёл» номли фильмда Антиопа ролини ижро этди ва шундан буён Marvel фильмларида рол ижро этмоқда.
Шунингдек, Робин 14 йил мобайнида Шон Пенн билан бир оила бўлиб яшади. 2018 йилга келиб «Saint Laurent» компанияси менежери Климент Жирога турмушга чиқди.
Иден Кепвелл-Кастилиё— Марси Уокер
Ишониш қийин, аммо актриса 2006 йил нафақага чиққан ва Американинг Оклахома штатидаги кичик бир шаҳарчанинг насроний руҳонийсига айланган. Актрисанинг ижоди учта – «Барчаси менинг болаларим», «Санта-Барбара» ва «Йўл кўрсатувчи нур» каби узундан узун сериаллардаги ҳамда бир нечта фильмдаги ролларидан иборат.
Айтганча, актриса 30 ёшига қадар тўрт маротаба оила қуриб, ажрашишга ҳам улгурган. У 20 йилдан буён бешинчи турмуш ўртоғи билан яшамоқда.
Круз Кастилиё — Адолфо Ларруэ Мартинес
Актёрнинг таржимаи ҳоли ҳам худди ўзи ижро этган сериалдаги қаҳрамони каби қизиқарли воқеаларга бой. Актёр мактабда ўқиб юрган вақтларида рок-гуруҳда қўшиқ куйлаган, 11 ёшида фильмларда суратга тушган. «Санта-Барбара» сериали суратга олинаётганда Адолфо анчагина тажрибали актёрга айланган эди, шунингдек, Круз Кастилиё образи учун «Эмми» мукофоти билан тақдирланган.
Мейсен Кепвелл—Лейн Дэвис
Актёр сериалдаги ролини 1989 йил тарк этди, мусиқий альбомлар чиқарди ва бор эътиборини театрга қаратди. Дэвис ҳозирда саҳнада рол ижро этади, шу билан бирга, ўзи ҳам Шекспирнинг асарларини саҳналаштиради. Баъзида кинолар ҳам суратга олиб туради.
София Кепвелл—Жудит Макконнелл
77 ёшли актриса ҳанузгача телешоуларда иштирок этиб келмоқда. Шунингдек, у катта лойиҳаларда ҳам иштирок этган. Масалан, «Ошиқлар», «Йиртқичлар макони», «Америкадаги жиноятчилик тарихи» каби сериалларда турли характердаги образларда намоён бўлган.
СиСи Кепвелл—Жед Алан
«Санта-Барбара» якунидан сўнг актёр фақат сериалларда ижодини давом эттирди. 2019 йил 9 март куни Жед юрак етишмовчилиги касаллигидан 84 ёшида вафот этди.
Лаёнелл Локриж—Николас Костер
Сериал намойишидан анча вақт ўтиб, 2010 йил Николас Костер Facebook саҳифаси орқали москвалик Елена Бородулина исмли аёлдан хабар олди. Унга кўра, садоқатли муҳлиса актёрнинг сериалдаги эпизодларини жамлаган роликни юборган. Шу тариқа актёр ва аёл ўртасида ёзишмалар давом этди. Орадан бир йил ўтиб, Николас Санкт-Петербургга келди ва илк бора улар учрашишга муваффақ бўлди. Кейин москвалик муҳлиса Америкага, Костернинг ёнига учди. Шундан сўнг уларнинг муносабати турмуш қуриш билан якунланди. Айтганча, Костер сўнгги пайтларда ҳеч қандай фильмда суратга тушмади.
Тед Кепвелл— Тодд МакКи
56 ёшга кирган актёр шу вақтгача оила қурмади. Бу эса унинг атрофида бўладиган миш-мишларни кучайтирган. Актёр аллақачон суратга тушиш ишларини тўхтатган ва инвестиция банкида молиявий маслаҳатчи вазифасида ишлайди.
Жулия Уэйнрайт-Кепвелл—Ненси Ли Гран
Бундан 16 йил аввал актриса ўзини телебошловчи сифатида ҳам синаб кўрди, аммо кейинчалик хайрия ишларига шўнғиб кетди. Афсуски, 2007 йил актрисага ўпка саратони ташхиси қўйилганди. Сўнг махсус терапия муолажасини олиб, соғайишга эришди. Ҳозирда у спиртли ичимликка муккасидан кетган инсонларга ёрдам беради.