Кино тарихидаги энг гўзал Жулетта — актриса Оливия Хассининг ҳаёти қандай кечди? (фото)

Шекспирнинг «Ромео ва Жулетта» асари бир неча марта экранлаштирилган. Лекин айнан 1968 йилда Франко Зэффирелли томонидан суратга олинган вариант актёрлар маҳорати ва уларнинг ўзига хос ташқи кўриниши билан эсда қолган. Мазкур фильмда Жулетта образини гавдалантирган актриса Оливия Хасси ҳақида маълумот бериб ўтамиз.

Режисор Зеффирелл фильмида севгиси фожиа билан тугайдиган образлар учун актёр ва актрисаларни танлашда бошқа режиссёрлардан фарқли йўл тутган. Унга бош қаҳрамонлар роли учун тажрибали, профессионал ижодкорлар эмас, ёш ва қиёфасида беғуборлик уфуриб турадиган уятчан йигит-қиз керак бўлган.

Оливия 1951 йил 17 апрелда Буэнос-Айресда дунёга келган. Болалигида ота-онаси ажрашган ва онаси фарзандларини олиб Лондонга кўчиб кетган. Оливия тўрт ёшиданоқ актриса бўлишни истаган ва мактаб театридаги тўгаракка қатнашни бошлаган.

Зэффирелли фильми учун Жулетта қидириб мингга яқин фотосурат ва мактублар билан танишган, юзлаб қизларни кастингда синаб кўрган. Уларнинг орасида Оливия ҳам бўлган ва минглаб қизлар орасидан айнан у танлаб олинган. Ромео ролини оддий инглиз оиласининг фарзанди Леонард Уайтинг ижро қилган ва бош роль ижрочиларининг ҳар иккиси ҳам кинодаги омадли дебюти сабаб «Олтин Глобус» мукофотига лойиқ деб топилган.

Премьерадан кейин актёрлар фильмни тарғиб қилиш учун дунё бўйлаб сафарга чиққан. Фильм муваффақиятли натижа қайд қилганига қарамай, актёрлар гонорари мақтанадиган даражада бўлмаган. Суратга олиш ишлари, тақдимот ва тадбирлардан чарчаган жамоага одамларнинг самимий табассуми ва қарсаклар билан кутиб олиши далда бўлган. Оливия шундай сафарларнинг бирида Британия қироличаси Елизавета II билан учрашган, шаҳзода Чарльз билан рақсга тушган.

1971 йилда актёр Дин Пол Мартинга турмушга чиққан ва ўғил фарзандли бўлган. Орадан 7 йил ўтган ва жуфтлик дўстона муносабатларни сақлаб қолган ҳолда ажрашишга қарор қилган. Актриса 1977 йилда Зэффиреллининг яна бир фильмида суратга тушади, кейинроқ Агата Кристининг детектив романи асосида суратга олинган «Нилдаги ўлим» фильмида ҳам роль ижро қилади.

Оливиянинг арсеналига назар ташланса, ўнлаб фильмларни учратиш мумкин, лекин уларнинг ҳеч бири «Ромео ва Жулетта» сингари омадли чиқмаган. 2003 йилда у Тереза она ролини ижро қилган.

2015 йилда бўлса «Ромео» ролини ижро қилган Уайтинг билан агар «Ромео» ва «Жулетта» ҳозирги даврда яшаса, уларнинг ҳаёти қандай кечиши акс эттирилган яна бир лойиҳада бирга суратга тушган. Айни вақтда 69 ёшда бўлган актриса мухлислар учун ҳамиша энг чиройли «Жулетта» бўлиб қолади.