Divya Bharti yorqin, ammo qisqa hayot kechirgan Bollivudning shou-biznes vakili hisoblanadi. Kino olamidagi 4 yillik faoliyati davomida 21 ta filmda rol o‘ynab mashhurlikka erishgan va muxlislar qalbidan joy olgan aktrisa haqida ma’lumot berib o‘tamiz.
Divya Bharti 1974-yil Mumbayda dunyoga kelgan. 14 yoshligidayoq filmda suratga tushishga taklif qilingan Divya, 1990-yilda “Boobili Rafa” filmida debyut rolini ijro qilgan. Teletomoshabinlar mazkur filmda kichik Shridevini ko‘rgandek bo‘lgan. Keyin “Koinot qalbi” filmida suratga tushgan, ammo film kinoprakatlarga chiqmagan. Shunga qaramay, unda aktrisa ijro etgan raqs oltin fonddan o‘rin olgan.
https://youtu.be/OaZv5Ew4NvM
Bir yil o‘tib Chiranjivi bilan birgalikda suratga tushgan ikki filmining premyerasi bo‘lib o‘tgan. Ushbu filmlar muxlislar tomonidan iliq qabul qilingan va 17 yashar Bharti eng ko‘p haq to‘lanadigan aktrisalardan biri bo‘lgan.
1992-yilda u “Uch jahldor erkak” filmida suratga tushadi, film unchalik mashhur bo‘lmagani bilan undagi “Saat Satunda” qo‘shig‘i xit bo‘lgan. 1992-yilda suratga olingan “Devona” filmida Rishi Kapur va hali mashhur bo‘lib ulgurmagan Shoxruh Xon bilan birga rol ijro qiladi.
Ushbu filmdagi roli sabab Divya “Filmfare” mukofotini qo‘lga kiritadi. “Chaqmoq va Shabnam“ filmining suratga olish jarayonida aktrisa bo‘lajak turmush o‘rtog‘i Sajid Nadialvala bilan tanishadi va juftlik 1992-yilda xufiyona turmush quradi.
Go‘zalligi, iste’dodi va mehnatsevarligiga qaramay, og‘ir fe’l-atvori sabab kinosanoatda hamma ham uni yaxshi ko‘ravermagan. Aktrisa 1993-yil 5-aprelda ko‘p qavatli uyning beshinchi qavatidan o‘zini tashlab, 19 yoshida hayotdan ko‘z yumgan. Uning o‘z joniga qasd qilishi sababi aniq bo‘lmasa-da, turli taxminlar yo‘q emas.
Ularning biriga qaraganda, aktrisaning turmush o‘rtog‘i Sajid mafiya guruhlaridan birining a’zosi bo‘lgan. U bir necha marta turmush qurgan bo‘lgan va yosh Divyani unga erga tegishga majbur qilgan. Shu tufayli ham ularning oila qurgani aktrisa hayoti o‘lim bilan yakun topmaguniga qadar e’lon qilinmagan. Divya nomidan shartnomalar imzolab, gonorarlarni cho‘ntagiga urgani va unga qo‘l ko‘targani aktrisa o‘zini baxtsiz his qilishiga sabab bo‘lgan. Qattiq depressiyaga tushgan aktrisa, spirtli ichimliklar keyinchalik giyohvand moddalarga bog‘lanib qolgan. Vafotidan avval Bharti ichgan bo‘lgan va qo‘shnilari uni taqdiri va hayotidan nolib baqirganini eshitgan. Mast holda o‘zini boshqara olmagan aktrisa derazadan o‘zini tashlagan.
Boshqa bir versiyada esa aktrisaning turmush o‘rtog‘i uni haddan ortiq yaxshi ko‘rgani va uning o‘limidan keyin ancha vaqtgacha o‘ziga kela olmagani aytiladi. Ta’kidlanishicha, Sajid turmush qursa ham Divyani unuta olmagan, suratga olgan filmlarini unga atagan. Bularning qay biri haqiqat ekani esa noma’lum. Divya Bharti kelinlik libosida minglab muxlislar qurshovida so‘nggi manzilga kuzatilgan.