Тошкентдаги Жаҳон иқтисодиёти ва дипломатия университетига янги ректор тайинланди

Ўзбекистон ҳукуматининг тегишли қарори билан Комилжон Каримов Жаҳон иқтисодиёти ва дипломатия университетининг ректори этиб тайинланди, деб хабар беради ЎзА.

Шу муносабат билан Комилжон Каримов Тошкент шаҳридаги Халқаро Вестминстер университетининг ректори лавозимидан озод қилинган.

Эслатиб ўтамиз, Комилжон Каримов 2015 йилда Тошкентдаги Халқаро Вестминстер университетининг янги ректори этиб тайинланганди. Бунга қадар у ЮНЕСКОда, Ўзбекистон таълим тизимида, Ўзбекистон Президенти ҳузуридаги Давлат ва жамият қурилиши академиясида ишлаган.

Абдужаббор Абдувоҳитовга Жаҳон иқтисодиёти ва дипломатия университетининг ректори вазифасини бажариш юклатилганлиги бекор қилинган. Абдужаббор Абдувоҳитов 2018 йилда Жаҳон иқтисодиёти ва дипломатия университетига ректор этиб тайинланганди.

Абдувоҳидов 2002—2011 йилларда Тошкентдаги Вестминстер университети ректори лавозимида фаолият юритган. 2011—2012 йилларда Жаҳон иқтисодиёти ва дипломатия университети ректори бўлган. Сўнгра Президент ҳузуридаги Давлат бошқаруви академиясига ректорлик қилган.

Тошкент шаҳридаги Халқаро Вестминстер университетига эса Баҳром Мирқосимов ректор этиб тайинланди.

Бундан ташқари, ҳукумат қарори билан Шуҳрат  Тешаев Бухоро давлат тиббиёт институти ректори вазифасини бажарувчи этиб тайинланди ва бошқа ишга ўтганлиги муносабати билан Амрилло Иноятов ушбу лавозимдан озод қилинган.

Эслатиб ўтамиз, Амрилло Иноятов июль ойида Президентининг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари лавозимига тайинланган эди.

Аввалроқ Тошкент давлат стоматология институтига янги ректор тайинлангани тўғрисида хабар берилганди.