Тошкент—Термиз йўналишидаги М-39 халқаро автомобиль йўли сунъий ёритиш чироқлари билан жиҳозланмоқда, дея «Дарё»га хабар беради Тошкент вилояти ИИБ ЙҲХБ ахборот хизмати.
Маълум қилинишича, Тошкент вилоятида йил бошидан буён содир бўлган йўл транспорт ҳодисаларининг 209 таси сутканинг қоронғи вақтида, 141 таси эса кеч соат 19:00 дан тунги 24:00 гача бўлган айни транспортлар тиғиз вақтда, 68 таси тунги соат 24:00 дан эрталабки 06:00 гача содир бўлган.
Тунда содир бўлган йўл-транспорт ҳодисаларининг 67 таси ёки 32,3 фоизи сунъий ёритилмаган йўлларда содир этилган.
Масаланинг ана шу томонларини инобатга олган ҳолда Йўл ҳаракати хавфсизлиги бошқармаси мутахассислари кўчаларни сунъий ёритиш чироқлари билан жиҳозлаш орқали йўл-транспорт ҳодисалари сонини камайтиришни режалаштириб, бу йўналишда бир қатор ишларни амалга оширмоқда.
«Асосий эътибор М-39 Тошкент—Термиз халқаро автомобилига қаратилди», – дейди Тошкент вилояти ИИББ ЙҲХБ йўл назорати бўлими бошлиғи, подполковник Эркин Раҳмонбердиев.
Раҳмонбердиевнинг таъкидлашича, ҳозирги кунгача ТҲАЙ унитар корхонасининг 397-йўл таъмирлаш бўлими ходимлари билан ҳамкорликда М-39 Тошкент–Термиз халқаро автомобиль йўлининг «Янгийўл», «Ислоҳот», «Мирзо Улуғбек» маҳалла фуқаролари йиғинлари ҳудудидан ўтган 838, 842 ва 845-километрларига сунъий ёритиш чироқларини ўрнатилди. Бу чироқлар биринчи навбатда пиёдалар хавфсизлигини таъминлаши қайд этилган.
Автомобиль йўлларини ёритиш ишлари босқичма-босқич, йўл-транспорт ҳодисалари таҳлили асосида амалга оширилади. Йўлларнинг ёритилиши эса ҳаракатланиш хавфсизлигини таъминлаш ишлари самарадорлигини оширишга хизмат қилиши таъкидланган.
Изоҳ (0)