Ўзбекистон Ташқи ишлар вазири Абдулазиз Комилов 2020 йилнинг 18 сентябрь куни Ўзбекистондаги дипломатик миссиясини якунлаётган Иордания подшоҳлигининг фавқулодда ва мухтор элчиси Солиҳ Аҳмад ал-Жаварнеҳни қабул қилди. Бу ҳақда Ташқи ишлар вазирлиги хабар берди.
Маълум қилинишича, суҳбат давомида сиёсий, савдо-иқтисодий ва маданий-гуманитар соҳаларда, шунингдек, БМТ ҳамда Ислом ҳамкорлик ташкилоти ва бошқа тузилмалар доирасидаги икки томонлама ҳамкорликнинг ҳолати ҳамда истиқболлари кўриб чиқилди.
Қайд этилишича, иқтисодий ва инвестициявий алоқаларни фаоллаштириш, ўзаро савдо ҳажмини оширишга устувор аҳамият қаратилмоқда. Хусусан, томонлар икки давлат ўртасида Ишбилармонлар қўшма кенгашини тузиш бўйича фикр алмашди.
Учрашув якунида вазир элчининг Ўзбекистон ва Иордания ўртасидаги кўп қиррали муносабатларни изчил ривожлантиришга қўшган шахсий ҳиссасини юқори баҳолади.
Солиҳ Аҳмад ал-Жаварнеҳ, ўз навбатида, Ўзбекистонда самарали фаолият юритишида қулай шароитлар яратилгани учун миннатдорлик билдирди.
Аввалроқ Абдулазиз Комилов Ўзбекистонда дипломатик фаолиятини якунлаётган Исроил давлатининг фавқулодда ва мухтор элчиси Эдуард Шапирани, Италиянинг фавқулодда ва мухтор элчиси этиб тайинланган Агостино Пиннани қабул қилгани ҳақида хабарлар берилганди.
Изоҳ (0)