Жиззах вилояти Шароф Рашидов туманидаги 11-умумтаълим мактабида ўқув йили бошланишининг биринчи кунида 9-синф ўқувчиси дарс вақтида тўсатдан вафот этганди. «Kun.uz»нинг хабар беришича, ҳозирда туман прокуратураси томонидан терговга қадар текшириш ҳаракатлари олиб борилмоқда.
Дастлабки тўпланган ҳужжатларга кўра, Ш.С.да сурункали касаллик, экспертиза кўригида унинг танасида бирон-бир тан жароҳати аниқланмаган.
Суд тиббий экспертизасининг дастлабки маълумотига кўра, ўқувчининг ўлимига ўткир нафас юрак-қон томир етишмовчилиги тез ва қисқа вақт ичида юзага келганлиги сабаб бўлган.
Ушбу мактабда ўқув йили 14 сентябрь кунидан бошланган бўлиб, Ш.С. дарсларга тўлиқ қатнашиб келган ва ўзлаштириши ўрта ҳолатда бўлган.
Мактабнинг 9-«в» синф раҳбари ўз тушунтириш хатида ўқувчида муқаддам касал бўлиш ҳолатлар бўлмаганлигини, дарсларга тўлиқ қатнашиб келмаганлигини, бирон-бир оғир касаллик билан касалланмаганлигини, дарсга келган вақтида ҳам ҳолати яхши бўлганлигини, ҳарорати 36,8 бўлганлигини маълум қилган.
Ҳолат бўйича суд тиббий экспертизаси тайинланган, мактаб директори, директор ўринбосарлари, мактаб психологи, 9-«в» синф раҳбари, «Зиёкор» ҚВП мудиридан тушунтириш хатлари олган.
Аввалроқ Тошкентдаги иккита мактаб очилганидан икки кун ўтиб карантинга ёпилгани тўғрисида хабар берилганди.
Эслатиб ўтамиз, Ўзбекистонда 14 сентябрдан бошлаб яна очилиб, анъанавий таълим фаолияти йўлга қўйилган мактаблар сони 2635 тани ташкил этди. Аксарият мактабларда анъанавий таълим октябрь ойига қадар тикланиши кутилмоқда. Бунда мактабларни очиш ҳақидаги қарор индивидуал тарзда жойлардаги ҳақиқий ҳолат ҳамда соғлиқни сақлаш тизими хулосаларига мувофиқ, маҳаллий кенгаш депутатлари рухсатидан сўнг қабул қилинади.
Изоҳ (0)