16 сентябрь куни ижтимоий тармоқларда Тошкент шаҳрининг бир қанча туманларида яшовчи аҳоли электр энергияси ўчирилганидан шикоят қилган хабарлар тарқалди. Улар электр энергияси ҳисоб-китобини назорат қилишнинг автоматлаштирилган тизими билан боғлиқ муаммоларни қайд этишган. «Gazeta.uz» «Ҳудудий электр тармоқлари» компанияси матбуот хизмати билан боғланиб, ҳолатга ойдинлик киритди.
Маълум қилинишича, электр энергияси қарздорлиги бор фуқаролар учун узилган. Лекин тўлов амалга оширилишига қарамасдан, электр энергиясининг узатилиши бир неча соатдан ҳам тикланмаган.
«Ҳудудий электр тармоқлари» маълумотларига кўра, бугунги кунда аҳолининг етказиб берилган электр энергияси олдидаги қарздорлиги 2,33 триллион сўмни ташкил этади. Электр энергиясини ҳисобга олиш ва назорат қилишнинг автоматлаштирилган тизими (ЭЭҲО ва НҚАТ) босқичма-босқич ишга туширилиши натижасида қарздор истеъмолчиларни оммавий ўчиришни бошлаган.
Бунинг натижасида 16 сентябрь куни республика бўйича 58 217 нафар қарздор истеъмолчи электр энергияси тармоғидан ўчирилган. Ушбу ўчирилган истеъмолчилар умумий қарздорлиги 8,9 миллиард сўмни ташкил этади.
«Қарздорликни тўлаган истеъмолчига, ўз вақтида электр энергиясининг улаб берилмаслигининг асосий сабаби, бир вақтнинг ўзида оммавий ўчириш ва қайта улаш бўйича сўровларга ишлов бериш бўйича тизимга юкланиш ҳаддан зиёд ортиб кетган. Шу боисдан тизим қайта уланишни 4-5 соатга кечикиб амалга оширди», — дейилади «Ҳудудий электр тармоқлари» компанияси изоҳида.
Компания айни пайтда тармоқдан узиб қўйилган истеъмолчилар тармоққа тўлиқ қайта уланганини айтмоқда.
«Шуни алоҳида айтиб ўтамиз, етказиб берилган электр энергиясидан қарздор бўлган истеъмолчини автоматик равишда ўчирилиш давом этади. Келажакда электр тармоқдан узилишнинг олдини олиш мақсадида, ҳурматли истеъмолчилар, истеъмол қилинган электр энергияси учун ўз вақтида тўловларни амалга оширишингизни сўраймиз», — дейилади баёнотда.
Аввалроқ 14 сентябрь куни Президент Шавкат Мирзиёев раислигида электр энергияси ва табиий газни ҳисобга олиш ҳамда назорат қилиш масалалари бўйича видеоселектор йиғилиши ўтказилган эди. Унда мамлакатдаги электр энергияси ва табиий газни ҳисобга олиш ва назорат қилиш бўйича яхлит онлайн тизим яратилиши белгиланган.
Эслатиб ўтамиз, Ўзбекистонда табиий газ назоратининг автоматлаштирилган ҳисобга олиш тизими жорий этилишини ҳақида «Ҳудудгазтаъминот» компанияси 2020 йилнинг бошида маълум қилганди. 2020 йил 20 август куни «Ҳудудий электр тармоқлари» АЖ томонидан Тошкентда Электр энергиясини ҳисобга олишни автоматлаштириш маркази фойдаланишга топширилди.
Изоҳ (0)