Коронавирусга қарши кураш штаби аъзоси Барно Абдусаматова гриппга қарши вакцина олиш даражасининг ортиши куз—қиш мавсумида аҳоли орасида нафас йўли касалликлари ва COVID-19 пандемияси пайтида соғлиқни сақлаш тизимига бўлаётган зўриқишни камайтириши билдирди.
«COVID-19 грипп мавсумида, яъни куз—қиш фаслида хавфлироқ бўлади, шунинг учун гриппга қарши вакцина қабул қилиш ҳозирги даврда ҳар қачонгидан ҳам муҳимроқ. Бу мажбурий вакцинация эмас, лекин биз буни олишни тавсия этамиз»,— дейди Абдусаматова.Шунингдек, мутахассис куз—қиш фаслида респиратор инфекциялар кўп учраши иммун тизимини пасайтириши, бемор ушбу даврда коронавирус юқтириб олса, оғир кечиши мумкинлигини билдирган. COVID-19 ва грипп ўзаро ўхшаш белгиларга эга бўлиб, ёши катта инсонлар, юрак ва ўпка ҳасталиклари каби сурункали касалликларга чалинганлар учун қаттиқ таъсир қилиши мумкин.
Гриппга қарши вакцина одамларни COVID-19’дан ҳимоя қилмаслиги, бироқ у грипп ривожланиш хавфини камайтириши, у билан боғлиқ асоратлар, жумладан, касалхонага жойлаштирилиш ва ҳатто ўлим хавфини камайтириши алоҳида таъкидлаб ўтилди.
Аввалроқ Ўзбекистон Соғлиқни сақлаш вазирлиги ҳузуридаги Коронавирусга қарши курашиш штаби аъзоси, эпидемиолог Рустам Икромов аҳолини грипп ва пневмонияга қарши эмлаш бўйича чора-тадбирлар режаси ҳукуматга тақдим этилгани, агар режа тасдиқланса, сентябрь ойидан эмлаш ишлари бошланишини билдирган эди.
Бундан ташқари, Юнусобод туманидаги 50-оилавий поликлиника бош шифокори Шоира Абдусатторова туман ҳокими раҳбарлигида ўтказилган йиғилишда туман аҳолисининг камида 70 фоизини гриппга қарши оммавий эмлашга келишиб олинганини маълум қилган эди. Унинг айтишича, 2018 ва 2019 йилларда Юнусободда аҳолининг фақат бир фоизи гриппга қарши эмланган. Коронавирусга қарши кураш штаби аъзоси Ҳабибулло Оқилов эса гриппга қарши мавсумий эмланишнинг коронавирусга ҳеч қандай алоқаси йўқлиги ва агар эмлаш вақтида бирор қўллашга қарши кўрсатмалар бўлмаса, одатий тартибда қилиниши мумкинлигини айтган.
Изоҳ (0)