Россияда иккинчи ва ундан кейинги коронавирус инфекциясининг тўлқинларидан фақат оммавий эмлаш орқали сақланиш мумкин. «РБК»нинг хабар беришича, бу ҳақда COVID-19’га қарши вакцина ишлаб чиқарган Гамалея номидаги марказ раҳбари Александр Гринцбург маълум қилди.
Фото: «Москва» АА
«Мақбул популяцион даражада эмланмагунимизча, афсуски, иккинчи, учинчи ва ўнинчи тўлқин ҳам бўлаверади», — деган у Россиянинг «Биринчи канал»ида эфирга узатилган «Док-ток» дастурида.
Сентябрь ойи бошларида Гринцбург Россия фуқароларини эмлаш учун 9-12 ой кераклиги, шундан сўнггина препаратни чет элга экспорт қилиш мумкинлигини айтган.
Унинг фикрича, Россияда пандемия оммавий эмлаш туфайли 2021 йилнинг ёзига бориб тугайди. Бундай натижага эришиш учун давлат барча имкониятларини ишга солиб, йилига 80 миллион доза «Спутник V» вакцинасини ишлаб чиқариши лозим.
Эслатиб ўтамиз, Россиянинг Гамалея институти томонидан яратилган ва «Спутник V» деб ном олган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади.
Шунингдек, COVID-19’га қарши иккинчи вакцина — «Вектор» ҳам тезлаштирилган тартибда рўйхатдан ўтказилади. Россиянинг «Вектор» давлат илмий маркази томонидан яратилган коронавирусга қарши вакцинанинг клиник синовларида иштирок этган кўнгиллиларда иккиламчи таъсирлар аниқланмаган.
Вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтганди.
