АҚШ президенти Дональд Трампнинг маълум қилишича, яқин бир неча ҳафта ичида коронавирусга қарши вакцина маъқулланади. Бу ҳақда »Интерфакс» хабар берди.
«Бизда бир неча ҳафта ичида вакцина бўлади. Бу тўрт, балки, саккиз ҳафтадан кейин юз бериши мумкин», — деди Трамп Fox News телеканалига берган интервьюсида.
Унинг қайд этишича, АҚШда вакцина яратиш устида «ажойиб компания» ишламоқда.
«Агар мен бўлмаганимда, бизда бир неча йил давомида вакцина бўлмаган бўларди. Бу жараённи (вакцина яратиш жараёни) Озиқ-овқат маҳсулотлари ва дори воситалари сифати устидан санитар назорат бошқармаси билан тезлаштирдим», — дея қўшимча қилди АҚШ президенти.
Аввалроқ Дональд Трамп вакцина 3 ноябрга белгиланган президентлик сайловига қадар тайёр бўлишини истисно қилмаганди.
Бироқ сентябрь ойида AstraZeneca компанияси COVID-19’га қарши вакцинанинг клиник синовларини беморларнинг бирида иккиламчи таъсир пайдо бўлгани сабаб тўхтатганини маълум қилган. Кейинроқ компания синовлар давом эттирилишини билдирди.
AstraZeneca АҚШда коронавирусга қарши вакцина синовларининг учинчи босқичини ўтказаётган учта компаниядан бири ҳисобланади. Айни пайтда мамлакатда Pfizer ва Moderna компаниялари ҳам коронавирусга қарши иккита вакцина синовларини ўтказмоқда.
Изоҳ (0)