Дональд Трамп Эрон АҚШга ҳужум қилишга уринса, ундан минг баравар шиддатлироқ жавоб қайтаришидан огоҳлантирди. «РБК»нинг хабар беришича, бу ҳақда у ўзининг Twitter’даги саҳифасида ёзиб қолдирган.

Унинг айтишича, Эрон генерал Қосим Сулаймонийнинг ўлдирилишига қасос сифатида АҚШга қарши суиқасд ёки бошқа ҳужумни режалаштираётган бўлиши мумкин. «Эроннинг АҚШга ҳар қандай кўринишдаги бирор-бир ҳужумига жавоб Эронга минг баравар шиддатлироқ бўладиган зарбадир!», — деб ваъда берган Трамп.

Қайд этилишича, куни кеча Politico нашри генерал Қосим Сулаймонийнинг ўлдирилишига жавоб тариқасида Эрон ҳукумати ЖАРдаги АҚШ элчиси Лану Марксга суиқасд режалаштирилганини маълум қилган. Нашр манбаси маълумотларига кўра, Марксга юзага келаётган хавф ҳақида АҚШ разведкаси баҳордан буён билган, аммо сўнгги бир неча ҳафтада тайёргарлик кўрилаётган ҳужум ҳақида янада батафсил маълумот пайдо бўлган. Хусусан, элчини ўлдириш фитнасига ЖАРдаги Эрон элчихонаси алоқадор бўлиши мумкинлиги маълум бўлган.

Нашрнинг қайд этилишича, Америка разведкаси нима учун эҳтимолий нишон сифатида айнан Эрон билан унча алоқадор бўлмаган Маркс танланганини тушунмаган. Нашр суҳбатдошларидан бирининг сўзларига кўра, буни элчининг АҚШ президенти Дональд Трамп билан азалий дўстлиги билан изоҳлаш мумкин.

Politico манбасининг қайд этишича, Марксга суиқасд олий мартабали генералнинг ўлдирилишига эҳтимолий жавобнинг бир неча вариантларидан бири холос.

Эслатиб ўтамиз, Эрон ислом инқилоби муҳофизлари корпуси (ИИМК)нинг «Ал-Қудс» махсус бўлинмаси генерали Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган. У ИИМКни террорчилик ташкилоти деб ҳисоблаган ва Қосим Сулаймонийни минтақада, хусусан, Ироқда бўлиб турган америкалик дипломатлар ва ҳарбийларга ҳужум қилишни режалаштирганликда айблаган. Эрон эса унга жавобан Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланган.