Жаҳон соғлиқни сақлаш ташкилоти 2020 йилнинг октябрь—ноябрь ойларида Европада коронавирус оқибатида ўлимлар сонининг ортишини кутмоқда. Бу ҳақда ташкилотнинг Европа минтақаси бўйича директори Ҳанс Клюге маълум қилди, деб ёзмоқда «РБК».
«Вазият мураккаблашмоқда. Октябрь, ноябрда биз юқори ўлим даражасининг гувоҳи бўламиз», — дея маълум қилган Клюге.
Унинг қайд этишича, коронавирус тарқалиши билан боғлиқ вазият ўқувчиларнинг мактабларга қайтиши ва грипп мавсуми сабабли ёмонлашиши мумкин. Ҳозирги пайтда Европада касалланиш ҳолатларининг ортиши кузатилмоқда, бироқ ўлимлар сони нисбатан барқарор қолмоқда.
Австрия ва Чехия ҳукуматлари 13 сентябрь куни эпидемиянинг иккинчи тўлқини бошланганини маълум қилган. Австрияда икки ҳафтада кунлик касалланишлари сони 2,5 марта ошган. Шу сабабли мамлакат аҳолисига барча хавфсизлик чораларини кўриш тавсия қилинган.
Жонс Ҳопкинс университети маълумотларига кўра, бутун дунёда коронавирус инфекцияси билан касалланганлар сони 29 059 868 кишини ташкил қилмоқда. COVID-19 оқибатида вафот этганларнинг сони эса 924 953 кишига етган. Дунё бўйича коронавирусга чалинганларнинг 19 652 377 нафари касалликдан тузалишга муваффақ бўлган.
Ўтган бир сутка ичида бутун дунёда коронавирус билан касалланганлар сони 307,9 минг кишига ошиб, янги суткалик рекорд қайд этилган.
Изоҳ (0)