«Пазик»ларни таъмирлаш ва тюнинг қилиш билан шуғулланувчи Нижегородск вилоятидаги хусусий компаниялардан бири тўлиқ узатмали «ПАЗ-3206» базасида шинам автоуйни яратди. Мижоз буюртмасига кўра, автобуснинг юриш қисми қайта ишланган, салони кенг хона шаклига келтирилган, деб хабар беради Motor.
«Пазик» кузови настарин рангига бўялган, том қисмига тент тортилган, барча тешиклари герметикланган, шунингдек, салоннинг иссиқлик ва шовқинни бостирувчи жиҳозлари яхшиланган.
Автобус интерьерига қора дарахт ёрдамида ишлов берилган, ошхонага раковина ва газ плитаси, музлаткич ва ҳатто кўчма мини-бар ўрнатилган. Ҳайдовчи ўриндиғи орқасидан тўртта стулли овқатланиш жойи ва шиша идишларни сақлаш учун жавон ўрин олган. Шунингдек, кемперда икки кишилик ётоқхона, душли санузел ва йиғма раковина ҳам бор.
Усталар автоуйни яратишда тўлиқ узатмали «ПАЗ-3206» базасидан фойдаланган. Иқтисодий тежамкорлик йўлида «ЗМЗ V8» бензин двигатели газга мослаштирилган, баллонлари эса автомобилнинг орқа ост қисмига ўрнатилган.
«Пазик»ни таъмирлаш учун 1,2 миллион рубль (15,6 минг доллар) сарфланган — автобусни эса мижознинг ўзи тақдим этган. Автобус категорияси D дан C га ўтказилгани сабаб уни умумий фойдаланиладиган йўлларда ҳам ҳайдаса бўлади.
Аввалроқ Москвада Lada 4х4 модели ғилдираклар устидаги уйга айлантирилгани тўғрисида хабар берилганди.
Изоҳ (0)