Қорақалпоғистоннинг Амударё туманида тўй сайлига чиққан тўққизта автомобиль йўл қоидасини бузганлиги сабабли жарима майдончасига жойлаштирилди. Бу ҳақда ЎзА хабар берди.
Фото: Telegram
Қайд этилишича, ижтимоий тармоқларда Қорақалпоғистоннинг Амударё туманида юз берган ҳодиса акс этган «Карантиндаги тўй» номли видеотасвир тарқалган. Мазкур видеода бир фуқаронинг автомашина люкидан танасини чиқариб кетаётганлиги акс этган.
Қорақалпоғистон Республикаси ИИВ ЙҲХБ маълумотига кўра, мазкур воқеа 2020 йил 5 сентябрь куни Амударё тумани Амударё овул фуқаролар йиғини ҳудудида содир бўлган. Фуқаро К.Ў.нинг никоҳ тўйида келин-куёв ва унинг дўстлари ушбу ҳудудда олтита Captiva, битта Malibu ва Lacetti ҳамда битта Matiz машиналарида тўй сайлига чиққан.
Тизилиб ҳаракатланган тўққизта автотранспорт воситаси бошқарувчилари йўл ҳаракати қоидаларига амал қилмаган ва Н.Ж. исмли фуқаро машинанинг люкидан танасини чиқариб, йўл ҳаракати қоидаларини қўпол равишда бузган.
Автотранспорт бошқарувчиларига чора кўриш мақсадида Қорақалпоғистон Республикаси Ички ишлар вазирлиги Йўл ҳаракати хавфсизлиги бошқармаси томонидан Маъмурий жавобгарлик тўғрисидаги кодекснинг 129-моддасига (транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) асосан маъмурий чора кўрилиб, автотранспорт воситалари вақтинча сақлаш учун жарима майдончасига қўйилган.
