Фарғона вилоятининг Сўх туманида мижозларнинг пластик карталаридан 150 миллион сўмдан ортиқ пул ўғирлаган банк ходими жазоланди. Бу ҳақда Олий суд матбуот хизмати хабар берди.

Маълум бўлишича, мижозларнинг пластик карточкалари фаолиятини кузатиш имконига эга бўлган «Агробанк»нинг Сўх туман филиали пластик карталар шўъбаси 1-тоифали мутахассиси Жавоҳир Тўраев (исм-шарифлари ўзгартирилган) 2017 йил март ойидан 2019 йил ноябригача банк мижозларининг иш ҳақи, пенсия ва нафақаларидан иборат 150 миллион сўмдан ортиқ пулларни яширин равишда талон-торож қилиб, ўз эҳтиёжларига сарфлаб юборган.

Хусусан, туманнинг Умбара қишлоғида яшовчи, «Сўх гидротранс» МЧЖ ҳайдовчиси Шоҳруҳ Неъматиллоев унинг ўғрилигидан энг кўп жабр чеккан. Банк ходими 2019 йил 30 март куни бу мижознинг пластик карточкасида 2 йилдан буён йиғилиб келаётган 37 383 877 сўм пулини бир уринишда ўғирлаган. Лекин кейинчалик 2019 йил июнь ойида пластик карта эгаси бундан хабар топиб, банк филиали бошқарувчисига мурожаат қилган. Жавоҳир Тўраев айбини тан олган. Филиал раҳбари ходимга 10 кун муҳлат берган, аммо муаммо муаммолигича қолаверган.

Шундан сўнг филиал бошқарувчисининг хабарига асосан мазкур ҳолат юзасидан «Агробанк»нинг Фарғона вилоят бошқармаси томонидан текшириш ўтказилади. Текширишда Жавоҳир Тўраевнинг 2017 март ойидан 2019 йил июль ойига қадар жами 60 нафардан ортиқ мижознинг иш ҳақи, пенсия ва нафақаларидан иборат 102 060 937 сўм пулларни талон-торож қилгани аниқланади. Тўраевнинг яқинлари келтирилган зарарни қоплаб беради. Аммо банкнинг вилоят бошқармаси ҳам, туман филиали раҳбарлари ҳам бу хусусда ҳуқуқни муҳофаза қилувчи органларга хабар бермайди. Аксинча у филиалнинг кадрлар бўлимига ишга ўтказилади.

Кадрлар бўлимида ишлаш жараёнида ҳам аввалги қинғир ишини давом эттиради ва 2019 йил 5 ноябрга қадар у талон-торож қилган маблағлар 150 миллион сўмдан ошиб кетади. Шундан кейингина жабрланувчиларнинг мурожаати асосида Жавоҳир Тўраевга нисбатан жиноят иши қўзғатилиб, Жиноят кодексининг 169-моддаси 3-қисми «а» банди (такроран ўғрилик содир этиш) билан айбдор деб топиб, қонуний жазога ҳукм этилган. Асосий жазога қўшимча равишда унинг молия-банк фаолияти билан шуғулланиши ва тизимга ишга жойлашиши чекланган. Айбдор тергов жараёнида ўзи келтирган зарарларни қоплаган.

Аввалроқ Андижонда «Агробанк» ходими 245 нафар ўқитувчи номидан 735 миллион сўмлик сохта кредит расмийлаштиргани аниқлангани, Наманганда қарийб 100 миллион сўмни ўзлаштирган «Агробанк» ходими ва унинг шериги қўлга олингани, Жиззахда 105 миллион сўмни талон-торож қилган «Агробанк» мансабдорларига жиноят иши қўзғатилгани ҳақида хабар берилган эди.