Қашқадарё Санитария-эпидемиологик осойишталик маркази 855 нафар ўқитувчи коронавирусга чалинганини рад этди. Ҳолбуки, мазкур маълумотни марказ бош врачи тасдиқлаганди

Қашқадарё вилояти Санитария-эпидемиологик осойишталик маркази вилоятда 855 нафар ўқитувчи коронавирусга чалинганини рад этди. Ҳолбуки, ушбу маълумотни СЭОМ бош врачи Собир Муродов «Дарё»га тасдиқлаганди.

Таъкидланишича, вилоятда коронавирус инфекциясининг кенг тарқалишига йўл қўймаслик ҳамда касалликдан гумонланувчилар ва аҳолининг мурожаатлари асосида COVID-19 вирусига лаборатория текширувлари олиб борилмоқда. Шу кунга қадар вилоят Санитария-эпидемологик осойишталик марказининг махсус лабораториясида 201 319 нафар фуқародан олинган таҳлил натижалари кўриб чиқилган. Натижада 2020 йил 15 сентябрь 10:00 ҳолатида вилоятда жами 1034 ҳолатда COVID-19 билан касалланиш қайд этилган. Айни пайтда эса вирусни юқтириб олган 958 нафар бемор даволаниб, соғайганларнинг умумий кўрсатгичи 93 фоизни ташкил қилмоқда.

Марказнинг қўшимча қилишича, вилоятдаги 1151 та умумтаълим мактабларида 55 562 нафар ўқитувчи ва бошқа ходимлар фаолият юритади ва уларнинг 32 892 нафари коронавирусга тест топширган.

«Дарё» мухбири билан суҳбатлашган вилоят халқ таълими бошқармаси бошлиғи Абдуғани Ҳимматов вилоятдаги мавжуд мактабларда 75 427 нафар ходим фаолият юритишини маълум қилиб, умумий ходимларнинг коронавирусга тест топшириши 43 фоизга етганини таъкидлаганди.

Қашқадарё СЭОМнинг Соғлиқни сақлаш вазирлиги расмий Telegram каналида эълон қилинган хабарида эса, мактаблардаги ходимлар сони кам кўрсатилгани боис коронавирусга тест топширган ходимлар фоизи юқорилангани кўзга ташланади.

Вазирлик каналида эълон қилинган хабарда, шунингдек, 855 нафар мактаб ходими вирус юқтирганликда гумонлангани айтилиб, уларда коронавирус аломатлари мавжуд эмаслиги алоҳида таъкидланади ва бу ҳақда қўшимча маълумотлар тақдим этилишига ваъда қилинади.

Эслатиб ўтамиз, «Дарё»да Ўзбекистонда юзлаб ўқитувчиларда коронавирус аниқланаётгани, бироқ ССВ барча ҳолатларни ҳам расмий статистикага киритмаётгани, Президент Шавкат Мирзиёев эса «ҳақиқий ҳолат бўйича рақамларни яширишга уриниш жиноий жавобгарликкача бўлган қатъий чораларга олиб келиши мумкин»лигидан огоҳлантиргани тилга олинганди.