Бош прокуратура: «Андижонда фуқарони ўлар даражада қийноққа солиш ҳолати бўйича жиноят иши октябргача судга юборилади»

Прокуратура томонидан Андижон шаҳрида ички ишлар ходимлари томонидан фуқаронинг ўлар даражада қийноққа солиниши юзасидан очилган жиноят иши пандемия сабабли бир муддат тўхтатиб турилган. Бу ҳақда Бош прокуратура матбуот хизмати раҳбари Ҳаёт Шамсутдинов «Дарё»га маълум қилди.

Эслатиб ўтамиз, Андижон шаҳар Ички ишлар органлари фаолиятини мувофиқлаштириш бошқармасининг 4-сонли Ички ишлар бўлимида 30 майга ўтар кечаси қийноққа солинган фуқаро А.Абдукаримов олган тан жароҳатлари оқибатида 11 июнь куни вафот этган эди. Ушбу воқеадан сўнг 4-сонли ИИБ жиноят-қидирув гуруҳининг уч нафар тезкор вакили — катта лейтенант Ф.Ҳусанбоев, катта лейтенант Э.Райимжонов ва катта лейтенант Қ.Қодиров ички ишлар органларидан бўшатилган, 1 июнь куни уларга нисбатан Жиноят кодексининг 206-моддаси (ҳокимият ёки мансаб ваколати доирасидан четга чиқиш), 234-моддаси (қонунга хилоф равишда ушлаб туриш ёки ҳибсга олиш) ҳамда 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан айб эълон қилиниб, суд қарори билан қамоққа олиш эҳтиёт чораси қўлланилган эди.

Бош прокуратура берган маълумотга кўра, қўзғатилган жиноят иши пандемия туфайли вақтинча тўхтатиб турилган. Октябрь ойига қадар тергов ҳаракатлари тугатилиб, иш ҳужжатлари судга тақдим этилади.

Олий суд матбуот хизмати раҳбари Азиз Обидов ҳам жиноят иши судга тақдим этилмаганини «Дарё»га маълум қилди. Июль ойи бошида Олий суд матбуот хизмати раҳбари Азиз Обидов ушбу жиноят иши суд томонидан жиноят процессуал қонунчилиги талаблари асосида ҳамда очиқлик ва шаффофлик тамойилларига мувофиқ кўриб чиқилиши, суд мажлисларида матбуот ва оммавий ахборот воситалари вакиллари ва жамоатчилик вакиллари иштирок этиши мумкинлигини айтиб ўтган эди.

Президент Шавкат Мирзиёев Чироқчи ва Андижонда ИИБ ходимларининг фуқароларни калтаклаши билан боғлиқ воқеалар учун соҳа раҳбарларини танқид қилганди. Инсон ҳуқуқлари бўйича Миллий марказ Андижонда фуқаронинг ИИБ томонидан қийноққа солинганини қатъий қоралаганди. Олий Мажлис Қонунчилик палатаси спикери ўринбосари, «Адолат» СДП сиёсий кенгаши раиси Наримон Умаров бир фуқарони қийноққа солиб, унинг ўлимига сабаб бўлган Андижон шаҳар ИИБ ходимлари ҳаракатига муносабат билдириб, Андижон шаҳар ИИБ ходимларининг ноўрин муносабати асносида касб шаъни оёқости қилингани, бир инсон энг олий ҳуқуқи бўлган яшаш неъматидан мосуво бўлгани, шу билан бирга, мамлакат раҳбарияти ва аҳоли томонидан давлатнинг халқаро имижини яхшилаш учун қилинаётган кўп сонли ҳаракатларга путур етганини таъкидлаганди.Ҳолат юзасидан ички ишлар вазири матбуот котиби Шоҳрух Ғиёсов Андижонда қийноққа солинган фуқаро вафоти сабаб узр сўраганди.