Ўзбекистонда Жанубий Корея билан ҳамкорликда юқори технологияга асосланган замонавий онкология тиббиёт маркази бунёд этилади, деб хабар бермоқда Соғлиқни сақлаш вазирлиги матбуот хизмати.
Бу ҳақда 16 сентябрь куни Алишер Шодмонов ва Корея тиббиёт ассоциацияси илмий-текшириш қўмитаси раиси, ушбу ассоциациянинг коронавирусга қарши курашиш бўйича штаби етакчи маслаҳатчиси, Корё университети профессори Сой Чже Ук учрашувида айтиб ўтилган.
Мулоқотда коронавирус инфекцияси билан касалланган беморларни самарали даволаш ва уларнинг касалликдан тезроқ тузалишлари учун юқори тиббий технологиялардан унумли фойдаланишни янада кучайтириш масалалари муҳокама қилинган. Шунингдек, Жанубий Корея билан ҳамкорликда юқори технологияга асосланган замонавий онкология тиббиёт маркази бунёд этилиши ҳам маълум қилинган.
20 май куни Президент Тошкентда Корея лойиҳаси асосида барпо этилган Болалар миллий тиббиёт марказига ташриф буюрганида унинг ёнида катталар учун ҳам замонавий клиника ҳамда олий ўқув юрти ташкил этилиши ҳақида айтган эди.
Алишер Шодмонов ва Сой Чже Ук учрашувида Корея билан ҳамкорликда ташкил этилаётган тиббиёт олий ўқув юрти ва онкология маркази ҳам шу ҳудудда жойлашиб, йирик тиббиёт комплекси ташкил этилиши маълум қилинди. Шу орқали тиббиёт тизимининг ҳам илмини, ҳам амалиётини энг илғор стандартлар даражасига кўтариш кўзланмоқда.