Жиззах вилояти Арнасой тумани ҳокими ўзгарди. Туманга Алимардонов Хуршид Шукуруллаевич янги ҳоким этиб тайинланди. Бу ҳақда Жиззах вилояти ҳокимлиги ахборот хизмати хабар берди.
Маълум қилинишича, 16 сентябрь куни Халқ депутатлари Арнасой туман кенгашининг навбатдан ташқари сессияси бўлиб ўтди. Йиғилишда Арнасой тумани ҳокими лавозимида ишлаб келган Жамолиддин Бердибоев лавозимидан озод этилди.
Кенгаш сессиясида Ўзбекистон Президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг ўринбосари Умар Исмоилов иштирок этди. Йиғилишда иштирок этган Жиззах вилояти ҳокими Эргаш Солиев Арнасой тумани ҳокими лавозимига Хуршид Алимардонов номзодини таклиф қилди. Депутатлар ушбу номзодни маъқуллади.
Хуршид Алимардонов 1979 йилда Бахмал туманида туғилган. У 2007 йилда Тошкент давлат юридик институтини тамомлаган. Мазкур тайинловга қадар Хуршид Алимардонов 2019 йилдан буён Шароф Рашидов тумани прокурори сифатида фаолият юритиб келаётган эди.
Лавозимини тарк этган Жамолиддин Бердибоев Арнасой туманига 2018 йилнинг апрель ойидан буён раҳбарлик қилиб келаётганди.
Аввалроқ Тошкент вилояти Пискент туманига, Қорақалпоғистон Республикасининг Қонликўл туманига янги ҳокимлар тайинлангани ҳақида хабар берилганди.
Изоҳ (0)