«Андижон ҳудудий электр тармоқлари» компанияси раҳбари Аҳаджон Жўраев Марҳамат тумани «Тошйўли» маҳалласидаги электр таъминоти билан боғлиқ муаммони ҳал этиш ишларини «эртагаёқ» бошлашга ваъда берганди — аҳоли вакилларининг сўзларига кўра, мутасадди айтган «эрта» ҳали ҳам келгани йўқ; туман электр тармоқлари корхонаси мутасаддилари эса «Йўламатол» маҳалласидаги кўчаларнинг биридан тушган яроқсиз бетон устун (симёғоч) боғлиқ мурожаатни шу маҳалланинг бошқа кўчасидаги симёғочларни сўрамай кўчириб олиб келиш билан ҳал қилган.
«Эрта» қачон келади?
Марҳамат тумани «Тошйўли» маҳалласи аҳолиси ҳудудда кўчаларга симёғочлар ўрнатиш, электр симларини белгиланган тартибда тортиш муаммоси кўпдан бери ҳал бўлмаётганидан норози бўлиб, «Дарё» интернет-нашрига мурожаат қилган эди.«25 йилдан бери эски, терак ёғочларидан ўзимиз ясаган устунларга эплаб сим тортиб, фойдаланяпмиз. Ёзмаган, бормаган жойимиз қолмади. Ҳаммаси ‘бўлади-бўлади’ дейди. Ҳокимликда ‘дастурга киритамизъдан бошқа гап йўқ», — дейди мурожаатчилардан бири.
Маҳалланинг Карвонйўли кўчасига бир неча йил аввал янги бетон устунлар ўрнатилган, аммо электр кабеллари тортилмай, иш чала қолган. Кўчадаги хонадон эгалари электр симларини ҳовли тарафдаги қўшнилари орқали — томма-том ўтказиб тортиб келган.
Шу муносабат билан «Андижон ҳудудий электр тармоқлари» компанияси бош директори Аҳаджон Жўраев «Дарё» сўровига биноан 2 сентябрь куни «Тошйўли» маҳалласида бўлган. У маҳалладаги ҳолатни ўрганиб, муаммони бартараф этиш бўйича ишлар эртаси кундан — 3 сентябрдан бошланишини учрашувга келган аҳолига айтган.
Бироқ, тошйўлиликларнинг «Дарё»га билдиришича, орадан икки ҳафта ўтса ҳамки, ҳудуддаги кўрсатилган муаммони бартараф этиш бўйича ҳеч қандай ҳаракат бошланмаган. «Андижон ҳудудий электр тармоқлари» матбуот хизмати вакили 16 сентябрь куни «Дарё» мухбири билан суҳбатда «ишлар эртадан бошланиши»ни айтди.
Бировнинг симёғочи
Август бошида Марҳаматнинг бошқа — «Йўламатол» маҳалласидан ҳам бетон устунлар (симёғочлар) муаммоси ва электр симлари тортилмагани устидан мурожаат тушган эди. Маълум бўлишича, Ариқбўйи кўчасига бир йил аввал симёғочлар ўрнатилган (шунда ҳам бутун кўчага эмас), лекин электр симлари тортилмаган. Йўламатолликлар ҳам — «Тошйўли» маҳалласидагилар каби — электрни қўшниларининг уйидан томма-том, ёғоч ходалардан қўлбола симёғоч ўрнатиб, тортган.Ушбу мурожаат юзасидан «Андижон ҳудудий электр тармоқлари»га сўров берилгач, компания вакиллари муаммо тез орада ҳал қилинишини билдирди. Ҳақиқатан ҳам 15—20 кун ичида маҳаллада сим тортиш ва симёғоч ўрнатиш ишлари олиб борилган, аммо симини тортиш вақтида бетон устунлардан бири ёрилиб кетган. Ёрилган устун жойида алмаштирилмаган, аҳоли вакиллари уни алмаштиришни, йўқса бирор одамнинг устига ағдарилиб, жароҳат етказиши мумкинлигини айтиб, бир неча бор мурожаат қилган.
Мурожаатлардан натижа бўлмагач, йўламатолликлар яна «Дарё» мухбири билан боғланган, мухбир эса туман ҳудудий электр тармоқлари корхонасига сўров берган. Корхона масъуллари маҳаллага келиб, вазиятни ўрганиб, муаммони ҳал қилишга ваъда берган. Ваъда бажарилган ҳам — нобоп симёғоч (бетон устун) ўрнига иккита янги устун ўрнатилган. Бироқ бу, «Йўламатол» аҳолисининг билдиришича, «кўзбўямачилик» бўлиб чиққан.
«Туман ҳудудий электр тармоқлари корхонасидан келиб, ёрилган симёғочни алмаштириб кетишганда ҳурсанд бўлдик. Афсуски, хурсандчилик узоққа чўзилмади. Қўшни кўчадан икки маҳалладошимиз келиб, кўчамизга янги ўрнатилган симёғоч аслида уларникилиги, уни олиб кетишларини айтишди. Ҳайрон қолдик. ‘Адашаётгандирсизлар, бекордан-бекорга олиб, ўрнатиб кетмас, туман электр тармоқларига тегишли бўлса керак’, десак, қўшни кўчадан келган маҳалладошларимиз бу симёғочларни ўз пулларига сотиб олишгани, симёғочларни улардан ҳеч ким сўрамай, уйининг олдидан олиб кетганини айтди», — деди мурожаатчи.«Андижон ҳудудий электр тармоқлари» матбуот хизмати «Дарё» мухбири билан суҳбатда «Йўламатол» маҳалласидан тушган мурожаат бўйича изоҳ бераркан, фуқароларнинг симёғочлари ўзларидан бесўроқ олиб кетилиб, бошқа жойга ўрнатилиши ёлғонлигини таъкидлади.