АҚШ Сенатидаги демократлар етакчиси Чарльз Шумер мамлакат соғлиқни сақлаш ва ижтимоий хизматлар вазири Алекс Азардан коронавирус тарқалишига қарши курашда президент Дональд Трампга қарши тура олмагани учун истеъфога чиқишни талаб қилди, деб ёзади The Hill.
Унинг сўзларига кўра, АҚШ Соғлиқни сақлаш вазирлиги президентнинг «инжиқликларини кўтаришга» имкон яратиб берган. «Мен вазир Азарни зудлик билан истеъфога чиқишга чақираман. Бизга президент Трампнинг сиёсий манфаатлари эмас, Америка халқи ҳақида қайғурадиган соғлиқни сақлаш вазири керак», — дейди Шумер.
Демократлар Соғлиқни сақлаш вазирини ўз идорасидаги тартибсизлик ва нотўғри бошқарув ҳақида маълум қилмаганликда айбламоқда. Хусусан, вазир ёрдамчиси Майкл Капуто олимларни Америка етакчисига қарши тил бириктиришда ва АҚШ Касалликлар профилактикаси ва назорати ҳисоботлари Оқ уй раҳбарининг сўзларига мос келиши учун уни ўзгартиришга уринганликда айблаган.
Аввалроқ АҚШ собиқ президенти Барак Обама мамлакатда коронавирусдан вафот этган 170 минг кишининг ўлими президент Дональд Трампнинг нопрофессионаллиги сабаб юзага келганини билдирганди.
Эслатиб ўтамиз, апрелда The Wall Street Journal Америка президенти аппаратидаги манбаларига таяниб, Оқ уй АҚШ соғлиқни сақлаш ва ижтимоий хизматлар вазири Алекс Азарни коронавирусга қарши кураш масаласида йўл қўйган хатолари учун лавозимидан озод этиши мумкинлиги ҳақида хабар берганди. Politico эса Оқ уй Соғлиқни сақлаш вазирлигига раҳбар сифатида бир неча номзодни кўриб чиқаётганини ёзган. Кейинроқ Трамп ушбу хабарларни рад этганди.
Изоҳ (0)