Ёсихидэ Суга Япониянинг янги бош вазирига айланди

Япония Либерал-демократлар партияси етакчиси Ёсихидэ Суга мамлакат ҳукуматининг янги раҳбари этиб тайинланди, деб хабар беради Kyodo агентлиги.

Унинг номзоди 16 сентябрь куни Япония парламенти Вакиллар палатаси депутатларининг кўпчилиги томонидан қўллаб-қувватланган. Янги бош вазирга 465 депутатдан 314 нафари овоз берган.

Суга ўзидан олдинги бош вазир Синдзо Абэнинг пул-кредит сиёсатини юмшатиш, дефляцияни камайтириш ва иқтисодиётни рағбатлантиришни давом эттиришга ваъда берган. Бундан ташқари, у миллий иқтисодиётни қўшимча равишда қўллаб-қувватлашни ваъда қилган.

16 сентябрь куни 71 ёшли бош вазири янги ҳукумат таркибини эълон қилиши кутилмоқда.

Япониянинг олдинги бош вазири Синдзо Абэ 28 август куни истеъфога чиқиши тўғрисидаги қарорини маълум қилганди. Абэ йўғон ичак яллиғланишидан азият чекади. Ушбу касаллик 2007 йилда ҳам истеъфога чиқишига сабаб бўлган. Бироқ кейинчалик у аҳволини ўнглаб, 2012 йилда яна бир бор бош вазир этиб сайланган эди. Яқинда касаллик яна авж олгани маълум бўлди.

24 август куни Синдзо Абэ ушбу лавозимда ишлаётганига 2799 кун тўлган, бу япон ҳукумати раҳбарлари орасидаги энг узоқ давом этган давр ҳисобланади.